İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 349 Hüküm no: 508 Orijinal metin no: [58b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah’ın kocası Ebûbekir b. Osman’dan boşandığı Mahmiye-i İstanbul mahallâtından Akseki mahallesi sâkinelerinden işbu râfi‘atü’l-kitâb Fâtıma bt. Abdullah nâm hâtun meclis-i şer‘-i şerîfde Ebûbekir b. Osman mahzarında üzerine takrîr-i da‘vâ edip, mezbûr Ebûbekir benim zevcim olup, bundan akdem eğer şürb-i hamr edersem benden zevcem mezbûre Fâtıma talâk-ı selâse ile mutallaka olsun deyû şart edip, ba‘dehû mezbûr Ebûbekir şürb-i hamr edip, şart-ı mezbûr bulunmak ile talâk-ı selâse bana nâzile olmuşdur. Suâl olunup benimle mu‘âşeretden men‘ olunmak taleb ederim dedikde, gıbbe’s-suâl mezbûr Ebûbekir cevâbında, fi’l-vâki‘ minvâl-i meşrûh üzre şart etmiş idim. Lâkin kable vücûdi’ş-şarti’l-mezkûr ve nüzûlü’l-talâki’l-mesfûr, zevcem müdde‘iyye-i mesfûreyi talâk-ı bâyin ile tatlîk etdiğimden sonra ba‘de tamâmi’l-iddet şürb-i hamr etmeğin, şartım lâ ilâ cezâ’in? münhal olup, talâk-ı selâse vâki‘ olmamışdır dedikde, gıbbe’l-istintâk, mezbûre Fâtıma hâl bu minvâl üzre olup, bu tarîk ile hîle-i şer‘iyye etdiğin bi’l-külliye inkâr edip, mezbûr Ebûbekir’den sıdk-ı cevâbına beyyine taleb olundukda beyyinesi hâzıra olmayıp istimhâl etmeğin, mehl-i şer‘î ile imhâl olunup, hakīkat-i hâl mütebeyyin olunca zevciyyet üzre mu‘âşeretden men olundu. Hurrire fî 8 min Recebi’l-mürecceb sene 1027. Şuhûdü’l-hâl: Mustafa b. Hasan, Abdünnebî b. Memi, Ferhad b. Abdullah, Himmet b. Fazlı, Osman b. Mustafa, Mustafa b. Hasan ve gayruhüm.