İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 351 Hüküm no: 512 Orijinal metin no: [59a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Despoyi v. Novay’ın kasap Manol v. Yorgi’de koyun bedelinden alacağı olduğu Vilâyet-i Rumeli’nde Şehirköy kazâsına tâbi‘ Hırınse? nâm karye sâkinlerinden ve Despoyi v. Navay nâm zimmî mahfil-i kazâda, İstanbul kasablarından Manol v. Yorgi nâm zimmî mahzarında üzerine da‘vâ edip, bundan akdem merkūm Manol her re’si yüz beşer akçeye olmak üzre bin yüz altmış yedi re’s koyunu yüz yirmi iki bin beş yüz otuz beş akçeye bey‘ ve teslîm edip, on bin akçesin yedinden alıp, zimmetinde yüz on iki bin beş yüz otuz beş akçe hakkım kalıp, suâl olunup merkūm Manol’dan merkūm hakkım alıverilmek taleb ederim dedikde, gıbbe’s-suâl mezbûr Manol cevâbında, fi’l-vâki‘ merkūm Despoyi’den iştirâ ve kabz etdiğim koyun semeninden hâlâ yüz on iki bin beş yüz otuz beş akçe deynim vardır, zimmetimde vâcibü’l-kazâ deynimdir dedikde, i‘tirâfı mûcebince edâsıyla mezbûr Manol ilzâm olundu. Hurrire fi’l-evâili Recebi’l-ferd li sene seb‘a ve ışrîn ve elf. Şuhûdü’l-hâl: Ahmed b. Ömer, Mehmed b. Ahmed, Nebi b. İbrahim, Sinan b. Abdullah.