İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 352 Hüküm no: 513 Orijinal metin no: [59a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Hamza’nın Mosi v. Yasyon’da tulum peyniri bedelinden alacağı olduğu İşbu râfi‘ü’l-kitâb Mehmed b. Hamza nâm kimesne meclis-i şer‘-i şerîfde, mahmiye-i İstanbul hısn-ı ebvâbından Ahırkapısı kurbunda sâkin olan Mosi v. Nason? nâm Yahudi mahzarında üzerine takrîr-i da‘vâ edip, târihi’l-kitâbdan iki yıl mukaddem beher kantârın beş yüz akçeye olmak üzre, yirmi kantâr tulum peyniri mezbûr Mosi’ye on bin akçeye bey‘ ve teslîm edip, ol dahi vech-i muharrer üzre iştirâ ve tesellüm eyledi. Yedinden sekiz bin akçesini alıp, iki bin akçe zimmetinde bâkī kalmış idi. Hâlâ bâkī kalan meblağ-ı merkūm iki bin akçeyi dahi mezbûrdan taleb ederim dedikde, gıbbe’s-suâl merkūm Mosi bi’l-külliye inkâr edip, müdde‘î-i mezbûrdan da‘vâsına mutâbık beyyine taleb olundukda, udûl-i Müslimînden İbrahim b. Mehmed ve İsmail b. Abdullah nâm kimesneler li ecli’ş-şehâde meclis-i şer‘a hâzırân olup, akībü’l-istişhâd, fi’l-vâki‘ târih-i kitâbdan iki yıl mukaddem merkūm Mosi yirmi kantâr tulum peyniri on iki bin akçeye müdde‘î-i mezbûr Hasan’dan iştirâ ve tesellüm eyledim deyû bizim yanımızda ikrâr eyledi. Bu husûsa şâhidleriz, şehâdet dahi ederiz deyû bi’l-muvâcehe edâ-yı şehâdet-i şer‘iyye eylediklerinde, ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a oldukdan sonra mûcebiyle hükm olunup, mâ vaka‘a bi’t-taleb ketb olundu. Tahrîren fi’l-yevmi’t-tâsi‘ min şehri Recebi’l-mürecceb li sene seb‘a ve ışrîn ve elf. Şuhûdü’l-hâl: Ahmed b. Şahbaz, Mustafa b. Hamza, Kadri b. Mustafa, Murad b. Mehmed ve gayruhüm.