İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 353 Hüküm no: 515 Orijinal metin no: [59b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kassâm-ı askerî muhzırı Mustafa’nın Abdülbâki’yi yaraladığı Mahmiye-i İstanbul’da Mehmed Ağa mahallesi sâkinlerinden el-Hâc Mehmed b. Abdullah nâm kimesne meclis-i şer‘-i şerîfe gelip takrîr-i kelâm edip, târih-i kitâb gecesi sulbiye kızım oğlu Abdülbâkī b. Mehmed nâm emredi beyne’l-ışâ’eyn bıçak ile vurup mecrûh etmişler. Kıbel-i şer‘den üzerine varılıp ba‘de’l-keşf ve’n-nazar cârihinden suâl olunup takrîri tahrîr olunmak taleb ederim dedikde, savb-ı şer‘den Mevlânâ Hamdi Efendi b. eş-Şeyh Mehmed el-müderris irsâl olunup, zeyl-i kitâbda mastûrü’l-esâmi olan Müslimîn ile mecrûh-ı mezbûrun menziline varıp bast ettiklerinde, fi’l-hakīka mezbûr Abdülbâkī’nin karnının sol cânibinde bıçak yarası olduğunu müşâhede edip, cârihinden suâl ettiklerinde mezbûr Abdülbâkī cevâbında, beni târih-i kitâb gecesi beyne işâ’eyn mahalle-i mezbûre sâkinlerinden olup, kassâm-ı askerî muhzırı olan Mustafa nâm kimesne mahmiye-i mezbûrede İstikāmet Efendi menzili demekle ma‘rûf menzil önünde amden vurup mecrûha etti. Cârihim mezbûr Mustafa’dır dedikde, vâki‘ hâli mevlânâ-yı mezbûr mahallinde tahrîr ve mahfil-i kazâda ihbâr ve takrîr etmeğin, mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâdî aşer min şehri Recebi’l-mürecceb li sene seb‘a ve ışrîn ve elf. Şuhûdü’l-hâl: Ali Efendi b. Ahmed el-hatîb fî câmi‘-i Sultan Şehzâde Mehmed Hân ve’l-imâm fi’l-mahalleti’l-mezbûre, Mehmed Halife b. Halil el-müezzin, Mustafa Çelebi b. Osman er-râcil, Segbân Ali Çelebi b. Ahmed, Mustafa b. İlyas el-kayyım, Ahmed b. Halil, Ahmed b. Musa, Mustafa b. Hamza.