İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 352 Hüküm no: 514 Orijinal metin no: [59b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kara Yorgi v. Karis Hasib v. Yakut’un öldürüldüğünün tescili Mahmiye-i İstanbul’da hâlâ subaşı olup cânib-i saltanat-ı aliyyeden husûs-ı âti’z-zikrin keşf ve izhâr ve emr-i şer‘-i şerîf üzre mûcibin icrâya me’mûr olan fahrü’l-akrân el-Hâc Mehmed b. Şaban nâm kimesne meclis-i şer‘-i şerîfde, Haseb v. Yakut nâm Ermeni mahzarında üzerine takrîr-i da‘vâ edip, mezbûr Haseb târih-i kitâb gecesi mahmiye-i mezbûre Macuncu Çarşısı’nda Müftü Hamamı önünde Kara Yorgi v. Karis nâm Ermeni’yi amden bıçak ile boynunun sağ cânibinden vurup katl etdi me’mûriyyetim hasebiyle suâl olunup icrâ-yı hak olunmak taleb ederim dedikde, gıbbe’s-suâl mezbûr Haseb cevâbında, fi’l-vâki‘ târih-i kitâb gecesi mezbûr Kara Yorgi’yi hamam-ı mezbûrun önünde minvâl-i muharrer üzre mücerred bıçakla boynunun sağ cânibine amden vurup ben katletdim deyû, bi tav‘ihî ikrâr ve i‘tirâf etmeğin, mûceb-i şer‘îsi icrâ olunmak için mâ vaka‘a bi’t-taleb ketb olundu. Şuhûdü’l-hâl: Es-Seyyid Burhan Efendi b. es-Seyyid Mehmed, Şaban Efendi b. Süleyman el-imâm, el-Hâc Ali b. es-Seyyid Musa, el-Hâc Süleyman b. Ahmed Hasan b. Hüseyin, Ahmed b. Hamza, Mustafa b.. Receb, Murad b. Mehmed ve gayruhüm mine’l-hâzırîn.