İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 355 Hüküm no: 520 Orijinal metin no: [60a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âbid Çelebi b. Abdi’nin, Rahime bt. Abdullah’da köle bedelinden alacağı olduğu Mumcu Kemal mahallesinde sâkin Âbid Çelebi b. Abdi meclis-i şer‘-i şerîfde Rahime bt. Abdullah mahzarında üzerine da‘vâ edip, bundan akdem on üç bin beş yüz akçeye Rûsiyyetü’l-asl Seher nâm câriye-i memlûkemi mezbûre Rahime’ye bey‘ ve teslîm edip, ol dahi iştirâ ve tesellüm etdikden sonra semen-i merkūmdan on bin akçesin mezbûre Rahime yedinden ahz u kazb edip, üç bin beş yüz akçesi zimmetinde bâkī kalmağla merkūmdan taleb ettiğimde, edâsından imtinâ‘ eder suâl olunup alıverilmesin taleb ederim dedikde, gıbbe’s-suâl merkūm Rahime cevâbında mezkûr câriyeyi âhara bey‘ ettirdeyim deyû mezbûr Âbid Çelebi’den aldım deyip, tafsîl-i sâbık üzre olan bey‘ ü şirâyı münkire olmağın, merkūm Âbid Çelebi’den sıdk-ı da‘vâsına beyyine taleb olundukda, ityân-ı beyyineden âciz olup istihlâf etmeğin, merkūm Rahime’ye vech-i muharrer üzre merkūme câriyeyi on üç bin beş yüz akçeye merkūm Âbid Çelebi’den iştirâ ve tesellüm etmediğine yemîn teklîf olundukda yemînden nükûl edip, müdde‘â-bih olan üç bin beş yüz akçe ile ilzâm olunup, mâ hüve’l-vâki‘ bi’t-taleb ketb olundu. Tahrîren fî evâili Recebi’l-ferd li sene seb‘a ve ışrîn ve elf. Şuhûdü’l-hâl: El-Hâc Ali Abdullah, İbrahim Çelebi b. Mustafa, Ahmed b. İlyas, Mehmed b. Zeynel, Mahmud b. Bâkī el-havâle, Mustafa Ağa b. ( ) Muhzırân ve gayruhüm.