İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 360 Hüküm no: 528 Orijinal metin no: [61b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Larende’nin Ağras köyündeki Döndü Hâtun vakfının, İstanbul Aksaray’da sâkin Çalabverdi b. İlyas’daki alacağının tahsil edilmesi İşbu râfi‘ü’l-kitâb Abdülganî b. Ahmed nâm kimesne meclis-i şer‘de İstanbul mahallâtından Aksaray mahallesinde sâkin olan Çalabverdi b. İlyas nâm kimesneyi ihzâr ve mahzarında üzerine da‘vâ edip, vilâyet-i Karaman’da Lârende kazâsına tâbi‘ Ağras nâm karyede vâki‘ Döndü Hâtun vakfına mütevellî olan Mustafa b. Halil nâm kimesne beni İstanbul’da zimem-i nâsda olan mâl-ı vakfı da‘vâ ve taleb ve kabza vekîl nasb etmişdir. Hâlâ İstanbul’da mahalle-i mezbûrede sâkin olan merkūm Çalabverdi’de dahi mâl-ı vakf-ı mezbûrdan bin akçe vardır, suâl olunup alıverilmek taleb ederim dedikde, gıbbe’s-suâl mezbûr Çalabverdi cevâbında, fi’l-vâki‘ vakf-ı mersûme mütevellî-i mûmâ-ileyh yedinden ahz olunma bin fiddî ve râyic fi’l-vakt akçe deynim vardır. Lâkin mütevellî-i sâlifü’z-zikr tafsîl-i sâbık üzre müdde‘î-i merkūm Abdülganî’yi tevkîl ettiği ma‘lûmum değildir deyû inkâr edip, müdde‘î-i mezbûrdan da‘vâsına mutâbık beyyine taleb olundukda, udûl-i Müslimînden İvaz b. Cafer ve Ramazan b. İsmail nâm kimesneler li ecli’ş-şehâde mahfil-i kazâda hâzırân olup, edâ-yı şehâdet-i şer‘iyye edip, fi’l-vâki‘ müşârun-ileyh mütevellî-i vâkıf-ı mûmâ-ileyhin İstanbul’da zimem-i nâsda olan düyûnu da‘vâ ve taleb ve kabza bizim huzûru[muzda] merkūm Abdülganî[’yi] tevkîl edip, merkūm dahi bi’l-muvâcehe kabûl etdi. Bu husûsa şâhidleriz şehâdet dahi ederiz deyû şehâdet ettiklerinde, ba‘de ri‘âyet-i şerâ’iti’l-kabûl şehâdetleri hayyiz-i kabûlde vâkı‘a olmağın, mûcebiyle ilzâm olunup, mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî aşer min Recebi’l-ferd li sene seb‘a ve ışrîn ve elf. Şuhûdü’l-hâl: El-Hâc Hüseyin b. Osman, Mustafa b. Abdullah, İsmail b. Ramazan, Ahmed b. Hasan, Hamza b. Sefer