İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 364 Hüküm no: 535 Orijinal metin no: [62b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şeyh Süleyman vakfının, Mehmed Çelebi b. Mehmed’deki vakıf alacaklarının tahsil edildiği Mahmiye-i Kostantıniyye’de İvazzâde mahallesinde vâki‘ merhûm Şeyh Süleyman vakfına berât-ı pâdişâhî ile bi’l-fi‘il mütevellî olan Kaya b. Abdullah nâm kimesne meclis-i şer‘-i kavîmde, hâmilü hâze’l-kitâb Mehmed Çelebi b. Mehmed muvâcehesinde ikrâr ve i‘tirâf edip, bundan akdem mezbûr Mehmed Çelebi vakf-ı mezbûr malından zimmetinde edâsı lâzım olan on iki bin akçe deyni mukābelesinde, mahalle-i mezbûrede vâki‘ bir tarafdan Atîke Hâtun bt. Mahmud mülkü ve bir tarafdan Hüseyin Ağa mülkü ve bir tarafdan tarîk-i âm ile merhûm-ı mûmâ-ileyh vakfı ile mahdûd olan mülk menzili, ale’t-tarîki’l-istiklâl bana bey‘ edip, ben dahi tevliyyet-i mahkiyem hasebiyle vakf-ı mezbûr için iştirâ ve tesellüm edip, ba‘de’t-tahliyye ve’t-tekābuz bin yirmi bir Cemâziyelâhiresi’nden tamamına varınca dek menzil-i mezbûru bin beş yüz akçeye merkūma îcâr ve teslîm edip, ol dahi istîcâr ve kabûl edip, ilâ hâze’l-ân her sene tamamında ücret-i merkūmeyi mezbûr Mehmed Çelebi yedinden ahz u kabz edegelmiş idim. El-hâletü hâzihî [deyn-i] asıl olup mârrü’z-zikr olan on iki bin akçe dahi mezbûr Mehmed yedinden bi’t-tamâm ahz u kabz edip, menzil-i mezbûru merkūm Mehmed Çelebi’ye teslîm edip menzil-i mezbûrda alâka ve medhalim kalmamışdır ve mezbûr Mehmed Çelebi zimmetinde asıldan ve ücretden bir akçe ve bir habbe bâkī kalmadı dedikde, mütevellî-i mezbûru ikrâr-ı meşrûhun el-mukarru lehü’l-mezbûr Mehmed Çelebi vicâhen tasdîk ve şifâhen tahkīk edicek, mâ hüve’l-vâki‘ gıbbe’t-taleb ketb ve yed-i tâlibe vaz‘ olundu. Tahrîren fî evâili Recebi’l-ferd li sene seb‘a ve ışrîn ve elf. Şuhûdü’l-hâl: Sinan Efendi b. Ali el-imâm, Mehmed Çelebi b. Süleyman el-bakkāl, Hüseyin Bey b. Abdullah en-nüvvâbü’s-sultânî, Mehmed b. eş-Şeyh Abdullah, Mustafa Çelebi b. Sinan el-müsta‘id ve gayruhüm.