İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 365 Hüküm no: 536 Orijinal metin no: [62b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Abdullah’ın, Abdi b. Musa’daki adalak iddiasını ispat edemediği Mahmiye-i Kostantıniyye’de vâki‘ Aksaray’da sâkin Ahmed b. Abdullah nâm kimesne meclis-i şer‘-i kavîmde Abdi b. Musa nâm kimesne muvâcehesinde üzerine da‘vâ edip, mezbûr Abdi zimmetinde cihet-i karz-ı şer‘îden on bin akçe hakkım olup, meblağ-ı mezbûrdan sekiz bin akçesin merkūm Abdi yedinden ahz u kabz edip, üç bin akçesi zimmetinde bâkī kalmışdır. Suâl olunup alıverilmesin taleb ederim dedikde, gıbbe’s-suâl mezbûr Abdi cevâbında, merkūm Ahmed’e cihet-i karzdan sekiz bin akçe deynim olup, mezbûre bi’t-tamâm edâ ve ifâ etdim deyip ziyâdeyi münkir olmağın, merkūm Ahmed’e ziyâdeye beyyine taleb olundukda ityân-ı beyyineden âciz olup istihlâf etmeğin, mezbûr Abdi’ye vech-i muharrer üzre merkūm Ahmed’e karz-ı şer‘îden sekiz binden ziyâde üç bin akçe dahi üzerinde müstahakkü’t-teslîm deyn-i şer‘îden hakkı olmadığına yemîn teklîf olundukda, mezbûr Abdi alâ vefk-i mes’ûle yemîn billâhi’l-azîm etmeğin, mâ hüve’l-vâki‘ gıbbe’t-taleb ketb olundu. Tahrîren fî evâili Recebi’l-ferd li sene seb‘a ve ışrîn ve elf. Şuhûdü’l-hâl: Ebûbekir b. Osman, Hamza b. Mustafa, Mehmed b. Timur, Hızır b. Halilî, el-Hâc Ali ve gayruhüm.