İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 368 Hüküm no: 541 Orijinal metin no: [63a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Melike Hâtûnun terekesi anlaşmazlığında babası ile kocasının sulh olduğu Mahmiye-i İstanbul’da Kadırga Limanı mahallesinde sâkine iken vefât eden Melike nâm hâtunun babası ve vârisi Yedinci? b. Abdullah meclis-i şer‘de müteveffât-ı mezbûrenin zevci olan râfi‘ü’l-kitâb Sinan b. Oruç mahzarında ikrâr ve takrîr-i kelâm edip, bundan akdem mezbûre Melike vefât etdikde muhallefâtından mezbûr Sinan yirmi altın kıymetli bir gümüş kuşak ve yirmi altın akçe kıymetli bir mor ferâce ve dört yüz akçe kıymetli bir yeşil atlas zıbın ve dört yüz akçe kıymetli bir kırmızı zıbın ve bir nezgeb ve bir arakiye ve bir al gömlek ve bir tarak ve bir baş makraması ve yirmi zirâ‘ bez ve bir sırmalı makrama kabz etmiş idi. Hâlâ zikr olunan eşyâyı mezbûr Sinan’dan taleb etmeğle, mâbeynimizde münâza‘ât-ı şedîde ve muhâsamât-ı kesîre vâki‘ olmuş idi. El-hâletü hâzihî beynimizde muslihûn tavassut ile husûs-ı mezbûru merkūm Sinan ile râyic fi’l-vakt üç bin beş yüz akçeye sulh olup, bedel-i sulh olan meblağ-ı mezbûru merkūm Sinan yedinden bi’t-tamâm alıp kabz edip, husûs-ı mezbûra müte‘allik olan da‘vâdan mezbûrun zimmetini ibrâ ve ıskāt etdim. Ba‘de’l-yevm husûs-ı mezbûra müte‘allika bi’z-zât ve bi’l-vâsıta da‘vâ dahi sudûr ederse, istimâ‘ olunmaya dedikde, mâ vaka‘a gıbbe’t-tasdîk kayd şüd. Hurrire fi’t-târihi’l-mezbûr sene [10] 27. Şuhûdü’l-hâl: El-Hâc Mustafa b. Mustafa, Küpeli? b. Abdullah, Hasan b. Mehmed, Mehmed b. Abdullah, Mustafa b. Dede, Bâli [b.] Mahmud, Ahmed b. Ömer, Hasan b. Musli.