İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 367 Hüküm no: 540 Orijinal metin no: [63a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeri İbrahim Beşe b. Abdullah’ın Kiryako v. Yani’deki alacağının ödenmesi hususunda kefîline mühlet verildiği İşbu râfi‘ü’l-kitâb İbrahim Beşe b. Abdullah nâm Yeniçeri mahfil-i kazâda zimmî tâ’ifesinden Papa İstavraki nâm zimmî mahzarında da‘vâ edip, bundan akdem Kiryako v. Yani zimmetinde cihet-i karzdan on bin akçe hakkım olup, meblağ-ı mezbûre merkūm İstivraki emr ve kabûlü hâviye kefâlet ile kefîl olmuşdur. Hâlâ meblağ-ı mezbûru mezbûrdan taleb ederim dedikde, gıbbe’s-suâl mezbûr İstivraki cevâbında, fi’l-vâki‘ müdde‘î-i mezbûrun merkūm Kiryako zimmetinde cihet-i karzdan hakkı olan meblağ-ı mezbûre ben kefîl oldum. Lâkin bi’t-tamâm mezbûr İbrahim Beşe’ye edâ etdim dedikde, gıbbe’l-inkâr, kefîl-i mezbûrdan beyyine taleb olundukda, ol dahi ityân-ı beyyine için istimhâl etmeğin, mehl-i şer‘î ile imhâl olundukdan sonra kefîl-i mezbûr İstivraki takrîr-i kelâm edip, mezbûr İbrahim Beşe bi gayri vech-i şer‘î beni evine celb etmişdir bana ve kefîl olduğum karındaşım oğlu mezbûr Kiryako’ya garaz eyleyip telbîs ve tezvîre sülûkünden havfımız vardır ben ve mezbûr Kiryako’dan taleb ettiği on bin akçeden gayrı hakkı var mıdır, suâl olunup cevâbı tahrîr olunmasın taleb ederim dedikde, gıbbe’s-suâl, mezbûr İbrahim dahi cevâb verip, kefîl-i mezbûrânla meblağ-ı merkūmeden gayrı alâkam yokdur. Fe-ammâ mezbûr Kiryako’da üç bin akçe dahi cihet-i âharîden hakkım vardır. Üç binden mâ‘adâ bir akçe hakkım dahi yokdur deyû i‘tirâf edicek, tarafeynin kelâmı zabten li’l-makāl tahrîr olunup, kefîl-i mezbûre mekfûlün-bih olan meblağ-ı mastûru edâ ettiğine beyyine-i âdile ikāmetine imhâl olundu. Hurrire fi’t-târihi’l-mezbûr. Şuhûdü’l-hâl: Cevad b. Halil, el-Hâc Ali b. Abdullah, Ahmed b. Şahbaz, Mehmed b. İbrahim.