İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 370 Hüküm no: 545 Orijinal metin no: [63b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Alacağını tahsil eden İstavri v. Nikola’nın Despina bt. Karagöz’ün rehin aldığı eşyaları iade ettiği Mahmiye-i Kostantıniyye’de Nişâncı mahallesi sâkinlerinden İstavri v. Nikola nâm zimmî meclis-i şer‘-i kavîmde, hâmiletü hâze’l-kitâb mahalle-i merkūme sâkinelerinden Despina bt. Karagöz nâm nasrâniyye muvâcehesinde ikrâr ve i‘tirâf edip, bundan akdem merkūme Despina’ya alâ tarîki’l-karz on üç aded kâmil guruş verip mukābelede bir kafes incü ve bir çift altun küpe ve bir altın hâtem ve bir demir sini ve bir mor kemhâ kaftan yedinde rehin-i makbûz idi. El-hâletü hâzihî meblağ-ı merkūm on üç aded kâmil guruşu merkūme Despina yedinden bi’t-tamâm ahz u istîfâ edip, fekk-i rehin olunmağla, zikr olunan kafes inciyi ve bir çift küpeyi ve hâtemi ve siniyi ve kaftanı, merkūme Despina’ya teslîm etdim dedikde, mukırr-ı mezbûr İstavri’yi ikrâr-ı meşrûhunda el-mukarru lehâ’l-mezbûre Despina vicâhen tasdîk ve şifâhen tahkīk edicek, mâ hüve’l-vâki‘ gıbbe’t-taleb ve yed-i tâlibeye vaz‘ olundu. Tahrîren fî evâili Recebi’l-ferd li sene seb‘a ve ışrîn ve elf. Şuhûdü’l-hâl: Ali b. Abdullah, Ali b. Abdullah, Ahmed b. Ömer, Abdurrahman [b.] Süleyman, Bekir b. Osman ve gayruhüm mine’l-huzzâr.