İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 373 Hüküm no: 553 Orijinal metin no: [64a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müteferrika Ömer Ağa b. Ahmed’in, Kadı Yahya Efendi b. Mehmed’e köle davasından men olunduğu Dergâh-ı âlî müteferrikalarından fahrü’l-akrân Ömer Ağa b. Ahmed meclis-i şer‘de Yenişehir kazâsından ma‘zûl umdetü’l-ulemâ’i’l-izâm Yahya Efendi ibni’l-merhûm Mehmed Efendi el-Mü’eyyedî tarafından husûs-ı âti’z-zikre vekîl olup, vekâleti nehc-i şer‘î üzre sâbite olan Mevlânâ Ahmed Efendi b. Mehmed mahzarında takrîr-i kelâm edip, işbu orta boylu açık kaşlı gök elâ gözlü sol bileğinde yanık nişânı olan Rûsiyyetü’l-asl Emine bt. Abdullah nâm memlûke câriyemi, Nâime bt. Mehmed nâm Hâtuna on iki bin akçeye bey‘ ediver deyû vermiş idim. Hâlâ câriye-i mezbûreyi sekiz bin akçeye mûmâ-ileyh Yahya Efendi’ye bey‘ etmiş, bey‘-i mezbûr makbûlüm değildir, suâl olunup alıverilmek taleb ederim deyû vekîl-i mezbûr istintâk olundukda, mezbûr Ömer Ağa câriye-i mezbûreyi bundan akdem on bin akçeye bey‘-i bâtt-ı sahîh ile mezbûre Emine’ye bey‘ ve teslîm edip, mülkü oldukdan sonra, ol dahi sekiz bin akçeye mûmâ-ileyh Yahya Efendi’ye bey‘ edip, târih-i kitâb senesi Recebi’nin yedinci gününde câriye-i mezbûrenin semeni mezbûre Emine’den da‘vâ ve taleb eyledikde, hâlâ Ahî Çelebi mahkemesinde nâ’ib olan Mevlânâ Abdullah b. Şeyh Mehmed huzûrunda murâfa‘a olup, câriye-i mezbûrenin semenin taleb etdikde, merkūme Emine hâl bu minvâl üzre müteveccih olduğuna mu‘terife olmağın, semen-i mezbûrun edâsıyla ilzâm olunup, habs olunmuşdur ve bu kelâmına muvâfık vech-i meşrûh üzre hüccet-i şer‘iyye ibrâz edip, mezbûr Ömer Ağa ba‘de’n-nazar mazmûn-ı hüccet-i mezbûreyi mu‘terif olmağın, da‘vâdan men‘ olundu. Tahrîren fi’l-yevmi’s-sâmin aşer min Recebi’l-ferd li sene seb‘a ve ışrîn ve elf. Şuhûdü’l-hâl: Mahmud Efendi el-mülâzım, Muslihiddin Efendi, İbrahim Bey el-cündî, Mustafa Ağa b. Abdullah, el-Hâc Ali, Hüseyin Beşe çukadâr, Ali Bey er-râcil.