İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 381 Hüküm no: 566 Orijinal metin no: [66a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Melike bt. Mehmed eşi Hüseyin b. Derviş’ten muhâla‘a yoluyla boşanması Mahmiye-i Kostantıniyye’de Kadırga Limanı mahallesinde sâkine Melike bt. Mehmed nâm kıbtiyye zevci hâmilü’l-kitâb Hüseyin b. Derviş nâm kıbtî mahzarında ikrâr-ı tâm ve ta‘bîr [ani’l-]merâm edip, zevci mezbûr Hüseyin zimmetinde olan bin altı yüz akçe mehr-i müeccelimden ve nafaka-i iddetimden fâriğa olmak üzre, merhûm Hüseyin ile muhâla‘a eylediğimizden sonra, hukūk-ı zevciyyete müte‘allik de‘âvî ve husûmâtdan ibrâ-i âm ile biri birinin zimmetin ibrâ ve terk-i da‘vâ etdik dedikde, mezbûre Melike’yi ikrâr-ı vâkı‘ında mezbûr Hüseyin dahi vicâhen ve şifâhen tasdîk ve zevc-i merkūm üzre biri biri ile muhâla‘a edip, hukūk-ı zevciyyete müte‘allik de‘âvî ve husûmâtdan biri birinin zimmetin ibrâ ve terk-i da‘vâ eylediklerin tahakkuk etdikten sonra, mezbûre Melike zimmetinde beynlerinde ma‘lûm mürtezika bahâsından olan sekiz yüz akçeden dahi zimmetin ibrâ ettim demeğin, mâ hüve’l-vâki‘ gıbbe’t-taleb ve’l-kabûl ketb ü tahrîr ve yed-i tâlibe def‘ olundu. Tahrîren fî 21 min Recebi’l-ferd li sene seb‘a ve ışrîn ve elf. Şuhûdü’l-hâl: Mustafa b. Cafer, Ali b. Abdullah, Derviş b. Abdullah, Fazlı b. Havlan?, Hızır b. Abdullah, Hızır b. Abdullah, Kara Mustafa b. Hasan, Sinan b. Mustafa, Bâli b. Mehmed ve gayruhüm.