İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 382 Hüküm no: 567 Orijinal metin no: [66a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa Efendi b. Abdullah’ın oturduğu vakıf evini Sinan Efendi b. Şeyh Sâlih’e devrettiği Mahmiye-i İstanbul’da Kadırga Limanı’nda merhûm Vezîriâzam Mehmed Paşa’nın Fethiye demekle ma‘rûf olan câmi‘-i şerîfi kurbunda vâki‘, bir tarafı Cerrah Ahmed mülkü ve bir tarafı Şahincibaşı olan Derviş Ağa b. Abdullah mülkü ve iki tarafı tarîk-i âm ile mahdûd olup üç bâb ulvî evleri ve muhavvatayı ve kenîfi ve su kuyusunu hâvî olan menzil, ashâb-ı hayrâtdan merhûm Üstâd Mahmud b. Abdullah’ın evvelâ Rıdvan b. Abdullah nâm abd-i atîkine, ba‘dehû mezbûr Rıdvan’ın evlâdına ve evlâd-ı evlâdına ve ba‘de’l-inkırâzi’l-evlâd-ı atîka-i vâkıf olan Gülahmer bt. Abdullah’a ve Gülsürûr bt. Abdullah’a vakıf olup ve ba‘de vefâtihîmâ menzil-i mârrü’z-zikrin sulehâ’-i ulemâdan bir recül-i sâlih [ve] âlim sâkin ola deyû ta‘yîn etmeğin, zikr olunan mevkūfün-aleyhim munkarızûn olmağla, ber-mûceb-i şart-ı vâkıf menzil-i mezbûrda olan [on] yıldan berî sulehâ’-i ulemâdan olup sâkin olagelen, iftihârü’l-müderrisîn Musa Efendi b. Abdullah meclis-i şer‘de hâmilü’l-kitâb ve fahrü’l-müderrisîn Sinan Efendi b. eş-Şeyh Sâlih Efendi’ye fâriğ olmağın, mûmâ-ileyh Sinan Efendi sâlih [ve] âlim ve mütedeyyin ve meskene etemm-i ihtiyâcı mütebeyyin olmağın tevcîh olunup zabt ve tasarrufiyçün bu vesîka ketb olundu. Tahrîren fî evâhiri Recebi’l-ferd li sene seb‘a ve ışrîn ve elf. Şuhûdü’l-hâl: Mefharü’l-emâcid Haydar Ağa b. Abdullah Kethüdâ-yı Hazret-i Cafer Paşa ve Zahrü’l-emâsil Mehmed Ağa b. Kethüdâ-yı Bevvâbân-ı Paşa-yı müşârün-ileyh, Umdetü’l-kuzât Abdullah Efendi.