İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 383 Hüküm no: 568 Orijinal metin no: [66a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun bt. Mehmed’in, kölesi tarafından bir gözünün çıkarılması sebebiyle eşi Seyyid Hasan aleyhine açtığı davadan vazgeçtiği Mahmiye-i İstanbul’da Ali Paşa-yı atîk mahallesi sâkinelerinden Fâtıma Hâtun bt. Mehmed meclis-i şer‘-i şerîfde hâlâ zevci olan es-Seyyid Hasan b. es-Seyyid Mustafa mahzarında ikrâr ve takrîr-i kelâm edip, târih-i kitâbdan iki ay mukaddem mezbûr es-Seyyid Hasan’ın ümmü’l-veledi olup hâzıra bi’l-meclis olan Gülistan bt. Abdullah sağ gözümü hatâ’en vurup mecrûh etmekle, ziyâsı zâil oldu deyû mûcibini mevlâsına tazmîn için da‘vâya mütesaddiye olmuşdum. El-hâletü hâzihî da‘vâ-yı merkūmeden fâriğa olup, merkūm es-Seyyid Hasan’ın zimmetini husûs-ı mezbûre müte‘allika olan de‘âvî ve husûmâtdan ibrâ-i âmm-ı câsim li’d-da‘vâ ile ibrâ etdim dedikde, mersûm es-Seyyid Hasan mukırra-i merkūmenin ibrâsın kabûl ve ikrâr-ı muvâfakatın tasdîk etdikden sonra, mâ hüve’l-vâki‘ gıbbe’t-taleb ketb olundu. Tahrîren fi’l-yevmi’l-ışrîn min Recebi’l-ferd li sene 1027. Şuhûdü’l-hâl: Hüseyin Efendi b. el-imâm, Mehmed Efendi b. Abdullah el-imâm, Abdullah b. Mahmud, Mehmed b. Ahmed, Osman b. Mustafa el-müezzin, Mustafa b. Pîrî er-râcil, el-Hâc Ahmed b. İlyas, Mustafa b. Hızır, Mehmed Halife el-müezzin, Mehmed Efendi b. Abdünnebî Kefeli ve gayruhüm mine’l-mezbûrîn.