İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 387 Hüküm no: 576 Orijinal metin no: [67a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. İstello’nun Petro v. Yorgi’deki alacağının tecil edildiği Mahmiye-i İstanbul’da Irgadpazarı sâkinlerinden işbu râfi‘ü’l-kitâb Yorgi v. Angelo Meclis-i şer‘-i şerîfde Petro v. Yorgi nâm zimmî mahzarında üzerine da‘vâ edip, bundan akdem mezbûr Petro zimmetinde deyn-i şer‘îden beş bin akçe hakkım olup, iki bin akçesin yedinden alıp kabz edip, üç bin akçesi zimmetinde kalmışdı. Suâl olunup şer‘ ile alıverilmesini murâd ederim dedikde, gıbbe’s-suâl mezbûr Petro cevâbında fi’l-vâki‘ müdde‘î-i mezbûre vech-i muharrer üzre deyn-i şer‘îden üç bin akçe deynim vardır. Lâkin târih-i kitâbet şehrinin yedinci gününde doksan güne değin müecceldir deyip, müdde‘î-i mezbûrdan istintâk olundukda deyn-i mezbûrun minvâl-i mezkûr üzre müeccel olduğun i‘tirâf etmeğin, mâ vaka‘a isre’t-taleb ketb olundu. Tahrîren fi’l-yevmi’l-hâdî ve’l-ışrîn min Recebi’l-ferd li sene seb‘a ve ışrîn ve elf. Şuhûdü’l-hâl: Mehmed Çavuş b. Feyzullah?, Osman Çavuş b. Ali, Murad b. Mehmed, Eyüb b. Mehmed, Mehmed b. (…)