İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 389 Hüküm no: 581 Orijinal metin no: [68a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pavoli bt. Hıristadola’nın ölen annesinin terekesini teslim aldığı Bundan akdem mahmiye-i İstanbul’da Ohri mahallesinde sâkine iken hâlike olan Hıristadola bt. Nikola nâm zimmîyenin kebîre kızı Pavoli meclis-i şer‘-i kavîmde, hâlike-i mezbûrenin zevci olan işbu râfi‘ü’l-kitâb Nikola v. Yorgi nâm zimmî mahzarında ikrâr ve takrîr-i kelâm edip, bundan esbak hâlike-i mezbûre muhallefâtından bana intikāl eden menkūlâtdan mezbûr Nikola yedinde bir erguvânî atlas fistan ve bir mor ferâce kalmış idi. Hâlâ zikr olunan fistan ile ferâceyi mezbûr Nikola yedinden alıp kabz edip, muhallefât-ı hâlike-i mezbûreye müte‘allika da‘vâdan mezbûr zimmetini ibrâ ve ıskāt etdim. Ba‘de’l-yevm husûs-ı mezbûre müte‘allik mezbûr Nikola ile vechen mine’l-vücûh da‘vâm yokdur dedikde, mukırr-ı mezbûreyi ikrâr-ı meşrûhunda mezbûr Nikola vicâhen ve şifâhen tasdîk edip, mâ vaka‘a bi’t-taleb ketb olundu. Hurrire fî evâhiri Recebi’l-ferd li sene seb‘a ve ışrîn ve elf. Şuhûdü’l-hâl: Receb b. İbrahim, Hasan b. Ahmed, Mustafa Çavuş b. Ali, Ali b. Abdi, Mustafa b. Hamza, el-Hâc Osman b. Abdullah.