İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 390 Hüküm no: 582 Orijinal metin no: [68a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Abdullah ile İshak b. Abdullah’ın at satışıyla davasında sulh olduğu Mahmiye-i Kostantıniyye mahallâtından ( ) mahallesi sâkinlerinden fahrü’l-akrân Ahmed Çelebi b. Abdullah nâm kimesne meclis-i şer‘-i kavîmde, işbu bâ‘isü’l-kitâb mahmiye-i mezbûrede ( ) sükkânından İshak b. Abdullah mahzarında ikrâr ve takrîr-i kelâm edip, bundan akdem merkūm İshak’dan iki sene mukaddem iki bin beş yüz akçeye bir re’s kır ve iğdiç at iştirâ ve kabz edip, semeni elân zimmetimde deyni iken, mezkûr İshak zikr olunan atı beş bin beş yüz akçeye bey‘ etdim deyû ziyâde semeni taleb edip, isbâta kādir olmayıp, merkūm atın dahi tansîf-i semen iktizâ eder beynimizde ma‘lûm ayb hâdis olup, üç binden ziyâdeye tahammülü olmadığı sikāt ihbârıyla ma‘lûm olmağın, alâ tarîki’s-sulh ani’l-inkâr zikr olunan beş bin beş yüz akçeye tuta, mezbûr bârgiri yine merkūm İshak’a bey‘ ve semenini takas edip, iki bin beş yüz akçesin nakden teslîm etmek üzre ıslâh etdiklerinde, ben dahi kabûl edip zikr olunan at ve akçeyi mezbûr İshak’a teslîm edip, bu husûsa müte‘allika da‘âvâdan zimmetin ibrâ etdim dedikde, gıbbe’t-tasdîk ve’l-kabûl mezkûr İshak dahi mârrü’z-zikr Ahmed Çelebi’nin zimmetin zikr olunan ata müte‘allik da‘vâdan ibrâ-yı âmm-ı kâtı‘u’n-nizâ‘ ile ibrâ etdim. Ba‘de’l-yevm husûs-ı mezbûra müte‘allika benden bi’z-zât veya vekîlimden bi’l-vâsıta da‘vâ sâdır olursa, lede’l-hükkâm mesmû‘a olmaya dedikde, tarafeynden sâdır olan ikrâr ve tesâduk inde’ş-şer‘i’ş-şerîf mukayyed buyurulup, mâ hüve’l-vâki‘ gıbbe’t-taleb kayd olundu. Fi’t-târihi’l-mezbûr. Şuhûdü’l-hâl: Mustafa Çelebi b. Ramazan el-cündî, Mehmed Beşe b. Abdullah, Mehmed b. Şaban, İbrahim [b.] Receb, Murad b. Halil ve gayruhüm.