İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 392 Hüküm no: 585 Orijinal metin no: [68b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çavuşbaşı Mehmed Ağa Vakfı’na ait hânenin kira bedelinin artırılması Mahmiye-i İstanbul’da merhûm Çavuşbaşı Mehmed Ağa vakfına mütevellî olan râfi‘ü’l-kitâb Mustafa b. İbrahim meclis-i şer‘de takrîr-i kelâm edip, vakf-ı mezbûrdan mahmiye-i mezbûrede Bezzâz-ı cedîd mahallesinde vâki‘ ma‘lûmü’l-hudûd iki bâb menzil, beher yevm bir akçe ücret ile hâzır bi’l-meclis olan Osman b. Abdullah el-Kerîm nâm kimesneye îcâr olunup, lâkin ücret-i mezbûre ecr-i misli olmamak ile vakf-ı mezbûra küllî gadr olmuşdur. Kıbel-i şer‘den üzerine varılıp menzil-i mezbûrun ne mikdâr ücrete tahammülü vardır müşâhede ve tahrîr olunmasın taleb ederim dedikde, musavvab-ı şer‘den Mevlânâ Abdüsselam Efendi ve Hâssa mi‘mârlarından Üstâd Ali b. Abdullah irsâl olunmağın, ânlar dahi zeyl-i kitâbda mastûrü’l-esâmi olan Müslimîn ile mahall-i mezbûra varıp, mezbûr Osman muvâcehesinde nazar eylediklerinde, menzil-i mezbûrun beher yevm iki akçe ücrete tahammülü vardır, noksan ile îcâr olunursa vakf-ı mezbûra gadr olunur deyû ittifâk etdiklerinde, mevlânâ-yı mezbûr mahallinde tahrîr edip, ba‘de gelip meclis-i şer‘de haber vermeğin, mâ vaka‘a bi’t-taleb ketb olundu. Hurrire fî evâili Recebi’l-ferd li sene seb‘a ve ışrîn ve elf. Şuhûdü’l-hâl: Es-Seyyid Hasan Efendi b. es-Seyyid Şâhkulu, Seydî Ali b. Seydî Ahmed, İbrahim b. Halil, Rıdvan b. Abdullah el-müezzin, el-Hâc Ali b. Hüsam, el-Hâc Ali b. Pîrî ve gayruhüm.