İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 391 Hüküm no: 584 Orijinal metin no: [68a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli b. Abdullah’ın başkasına ait çıkan satın aldığı câriyenin bedelini Abdülbâki b. İbrahim’den istemesi Mahrûse-i Bursa sâkinlerinden râfi‘ü’l-kitâb Veli b. Abdullah mahfil-i kazâda, mahmiye-i Kostantıniyye’de Uzun Yusuf mahallesinde sâkin Abdülbâkī b. İbrahim mahzarında üzerine da‘vâ edip, işbu hâzır fi’l-meclis olan Rûsiyyetü’l-asl Bâdısabâ bt. Abdullah nâm câriyeyi, bundan akdem altı bin fıddî ve râyic fi’l-vakt akçeye, mezbûr Abdülbâkī’den iştirâ ve kabz edip semeni teslîm etmiş idim. El-hâletü hâzihî câriye-i merkūme yedimde iken Fâtıma bt. Hüseyin nâm hâtun câriye-i merkūmeye müstahık çıkup, bi’l-fi‘il mahrûse-i Bursa’da hâkimü’ş-şer‘i’ş-şerîf olan a‘lemü’l-ulemâ’i’l-mütebahhirîn Şeyhzâde Ahmed Efendi huzûrunda mülk-i mutlak da‘vâsın edip, inkârından sonra şuhûd-ı udûlle isbât edip, hâkim-i mûmâ-ileyh -esbağallâhu te‘âlâ ni‘amehû aleyh- hazretleri dahi merkūme Bâdısabâ’yı müstahıkk-ı merkūmeye hükm edip, yed ve malımdan ihrâc edip mezbûreye teslîm etdirdiğine binâen, ben dahi bâyi‘im olan mârrü’z-zikr Abdülbâkī’ye mürâca‘at bi’s-semen taleb ederim dedikde, gıbbe’s-suâl mezbûr Abdülbâkī cevâbında, fi’l-vâki‘ câriye-i merkūmeyi mezbûr Veli’ye semen-i merkūm altı bin akçeye bey‘ ve teslîm edip kabz-ı semen etmiş idim. Ve tafsîl-i sâbık üzre sâlifü’z-zikr Veli’nin da‘vâ-yı istihkāk edip hâkim-i mârrü’z-zikrin hükmü ile elinden alınmağın, mezbûr Veli için benim üzerime istircâ‘ bi’s-semen lâzım geldiği ma‘lûmumdur deyû istihkāk etdiğimde, mezbûr Abdülbâkī meblağ-ı merkūm altı bin akçenin müdde‘î-i merkūma edâsıyla ilzâm olunup, mâ vaka‘a gıbbe’t-taleb ketb ve yed-i tâlibe def‘ olundu. Tahrîren fi’l-yevmi’l-âşir min Recebi’l-ferd li sene seb‘a ve ışrîn ve elf. Şuhûdü’l-hâl: Hızır Beşe er-râcil, Sefer Beşe er-râcil, Mustafa b. Gülabi, Şaban b. Abdullah, Veli b. İbrahim ve gayruhüm mine’l-hâzırîn.