İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 394 Hüküm no: 589 Orijinal metin no: [69a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Abdullah’ın mahkeme kararı ile elinden alınan kısrağın bedelini, Şehriyar v. Bahtiyar’dan taleb etmesi Yeniçeri zümresinden Mustafa Beşe b. Abdullah meclis-i şer‘-i şerîfde Ermeni tâ’ifesinden Şehriyar v. Bahtiyar mahzarında takrîr-i kelâm edip, târih-i kitâbdan dört sene mukaddem mezbûr Şehriyar’dan yirmi beş buçuk guruş kebîre alnı sakar bir al kısrak iştirâ edip, kabz-ı semen ve teslîm-i mebî‘ olmuşidim. Lâkin zikr olunan kısrak kasaba-i Tokat sâkinlerinden Sefer Ağa b. Abdullah nâm kimesnenin mülkü olup zâyi‘ olmuş imiş. Kasaba-i merkūmede hâkimü’ş-şer‘ huzûrunda mülkü olup zâyi‘ olduğunu şuhûd-ı udûl ile şer‘an isbât edip, yedimden hükm-i hâkimü’ş-şer‘le ahz edip, ben dahi semenine mürâca‘at etmek isterim, suâl olunsun dedikde, gıbbe’s-suâl mezbûr Şehriyar cevâbında, müdde‘î-i merkūme târih-i merkūmdan yirmi iki guruşa bir re’s al kısrak bey‘ ve teslîm ve kabz-ı semen etmişdim. Benim bey‘ eylediğim kısrağımın alnında sakarı yok idi. Ve mezbûr Sefer Ağa’nın isbât edip ahz eylediği kısrak benim bey‘ ettiğim kısrak idiği ma‘lûmum değildir deyicek, müdde‘î-i mezbûrdan takrîrine muvâfık beyyine taleb olundukda, beyyinem hâzır fi’l-beled değildir dedikde, vâki‘ hâl hıfzan li’l-makāl mezbûr Şehriyar talebiyle ketb olundu. Tahrîren fî evâhiri Recebi’l-ferd li sene seb‘a ve ışrîn ve elf. Şuhûdü’l-hâl: Mustafa b. Cafer, Hamza b. Mustafa, İsmail b. Abdullah.