İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 395 Hüküm no: 591 Orijinal metin no: [69a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Cafer’in, mühtedi Fâtıma bt. Abdullah aleyhindeki alacak davasının daha önce anlaşma ile sonuçlandığının tespiti Mahmiye-i İstanbul’da Kırkçeşme mahallesi sâkinelerinden Fâtıma bt. Cafer nâm hâtun mahfil-i kazâda Fâtıma bt. Abdullah nâm mühtediye mahzarında üzerine da‘vâ edip, mezbûre Fâtıma’ya bundan akdem bin iki yüz akçe kıymetli bir al dârâyî kaftan ve dört yüz akçe kıymetli bir yeşil temiz üst kaftanı ve sekiz yüz akçe kıymetli bir bürüncek gömlek ve kırk endâze keten bezi, her endâzesi kırk akçe hesâbı üzre bin altı yüz akçe kıymetli, cem‘an dört bin akçe hakkım vardır. Hâlâ taleb ederim suâl olunsun dedikde, gıbbe’s-suâl mezbûre Fâtıma cevâbında, bundan akdem eşyâ-yı mezkûrenin bahâsını benden da‘vâ etdikde, ben dahi müdde‘iyye-i mezbûre zimmetinde karz-ı şer‘îden olan iki bin yedi yüz akçe hakkımı da‘vâ eylediğimde, beynimizde münâza‘ât-ı kesîre ve muhâsamât-ı şedîde vâkı‘a olup, muslihûn tavassutu ile üzerinde olan meblağ-ı mezkûr iki bin yedi yüz akçeden mâ‘adâ dört yüz akçe vermek üzre inşâ’-i akd-i sulh edip, müdde‘iyye-i mezbûre Fâtıma dahi sulh-ı mezbûru kabûl ve bedel-i sulh olan meblağ-ı mezkûr dört yüz akçeyi benden bi’t-tamâm ahz u kabz eyledikden sonra, bir birimizin zimmetini ibrâ etmişdik dedikde, gıbbe’s-suâl ve akībü’l-inkâr ve isre’l-istişhâd udûl-i Müslimînden Mustafa b. Hasan ve Mehmed b. Timur ve Mustafa b. Hamza nâm kimesneler meclis-i şer‘a li ecli’ş-şehâde hâzırûn olup, gıbbe’l-istişhâd, fi’l-vâki‘ müdde‘iyye-i merkūme mersûme Fâtıma’dan minvâl-i mastûr üzre meblağ-ı mesfûru da‘vâ etdikde, bizim huzûrumuzda vech-i meşrûh üzre sulh olup, bir birinin zikr olunan husûsa müte‘allik da‘vâdan zimmetlerini ibrâ ettiler. Husûs-ı mezbûre biz şâhidleriz şehâdet dahi ederiz deyû edâ-yı şehâdet-i şer‘iyye eylediklerinde, gıbbe ri‘âyet-i şerâ’iti’l-kabûl şehâdetleri hayyiz-i kabûlde vâkı‘a oldukdan sonra müdde‘iyye-i merkūme Fâtıma da‘vâdan men‘ olunup, mâ vaka‘a bi’t-taleb ketb olundu. Hurrire fî evâhiri Recebi’l-ferd li sene seb‘a ve ışrîn ve elf. Şuhûdü’l-hâl: El-Hâc Kadri b. Osman, Hasan b. Veli, Mehmed b. Ali.