İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 399 Hüküm no: 599 Orijinal metin no: [70a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülbâki Çelebi’nin Nesli Hâtun bt. Hamza’ya açtığı mülk davasından vazgeçtiği Mahmiye-i İstanbul’da Kurukavak mahallesinde bundan akdem vefât eden Ahmed Çavuş b. ( ) verâseti sulbî kebîr oğlu Abdülbâkī Çelebi’ye ve sulbiye kebîre kızları Sâkine Hâtun ve Musâhibe Hâtun ve zevce-i metrûkesi Kamer Hâtun’a münhasıra idiği mütehakkik oldukdan sonra, mezbûr Abdülbâkī Çavuş asâleten ve mezbûretân Sâkine Hâtun ve Musâhibe Hâtun taraflarından husûs-ı âti’z-zikre vekîl olup, hasm-ı şer‘î-i câhid mahzarında mezbûr Abdülbâkī Çavuş ve Rıdvan b. Abdullah şehâdetleri ile şer‘an vekâleti sâbite olan fahrü’l-kuzât Ali Efendi b. eş-Şeyh Mustafa vekâleten meclis-i şer‘-i şerîfde, râfi‘atü hâze’l-kitâb Nesli Hâtun bt. Hamza mahzarında takrîr-i kelâm edip, mahmiye-i merkūmede Hasan Paşa mahallesinde vâki‘ bir tarafdan Fâtıma Hâtun mülkü ve bir tarafdan Mustafa nâm kimesne mülkü ve bir tarafdan Ahmed Çelebi Vakfı ve bir tarafdan tarîk-i âm ile mahdûd olup mezbûre Nesli Hâtun hâzıra bi’l-meclis olan Suhbî Hâtun bt. Ramazan’dan on dokuz bin akçe iştirâ ettiği menzil müteveffâ-yı mezbûrun mülkü idi. Ba‘de’l-vefât verese-i merkūmeye intikāl etti deyû da‘vâ ettikde, mezbûre Suhbî Hâtun müteveffâ-yı mezbûr menzil-i merkūmu hâl-i sıhhatinde bana hibe ve temlîk etmişidi. Mülk-i mevhûbum olmağla, mezbûre Nesli Hâtun’a bey‘ etdim deyip beynimizde münâza‘ât-ı kesîre vâkı‘a olmuşidi. El-hâletü hâzihî müteveffâ-yı merkūm hâl-i sıhhatinde mezbûre Suhbî Hâtun’a menzil-i mersûmu hibe-i şer‘iyye ile ve teslîm ettiği yakīnen ma‘lûmum olmağın, menzil-i mezkûra müte‘allik da‘vâdan fâriğ olup, asâleten ve vekâleten menzil-i merkūma müte‘allik da‘vâdan mezbûre Nesli hâtunun zimmetini ibrâ-yı âmm-ı kâtı‘u’n-nizâ‘ ile ibrâ etdik dediklerinde, mukırrân-ı mezbûrânı ikrâr-ı meşrûhlarında el-mukarru lehü’l-mezbûre bi’l-muvâcehe tasdîk edip, mâ hüve’l-vâki‘ gıbbe’t-taleb ketb olundu. Tahrîren fi’l-yevmi’s-sâlis min Şa‘bâni’l-mu‘azzam sene sitte seb‘a ve ışrîn ve velf. Şuhûdü’l-hâl: Hüsameddin Efendi el-kadı, Ali Bey b. Mustafa en-nüvvâbü’s-sultânî, Süleyman Bey [b.] Hamza, Yusuf Çelebi b. Abdurrahman, Ebûbekir b. Osman, Abdurrahman b. Süleyman, Murad b. Mehmed, Murad b. Halil ve gayruhüm.