İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 400 Hüküm no: 600 Orijinal metin no: [70b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Musli’nin tasarrufundaki tarlalarının Ahmed b. Mehmed’e verildiğine dair hüccet talebi İşbu sâhibü hâze’s-sahîfe Ahmed b. Mehmed nâm kimesne mahfil-i kazâda hâzır olup takrîr-i kelâm edip, vilâyet-i Rumeli’nde Nevrekob kazâsına tâbi‘ Teşon nâm karye sâkinlerinden iken fevt olan Musli nâm kapıcının evlâd-ı zükûru kalmayıp, üç kızları kalıp, karye-i merkūme sınırı dâhilinde vâki‘ tasarrufunda olup lede’l-ahâlî ve’l-cîrân hudûdları ma‘lûme olan tarlaları ve çayırları ve yaylak ve cevherlik yerleri mahlûle olup, bi hasebi’l-kānûn tapuya müstahak oldukda, hakk-ı karârı ile kızlarına teklîf olundukda, taleb ve rağbet etmedikleri ecilden, ben tâlib ve râgıb olup, arâzî-i mezbûre zâbiti olan Mehmed Halife yedinden yirmi beş akçe resm-i tapu alıp, kabz edip arâzî-i merkūmenin tasarrufiyçün yedime hat ve hâtemini müştemil temessük vermişdir. Nazar olunup li ecli’l-isti‘lâm kıbel-i şer‘den dahi yedime hüccet verilmesini taleb ederim deyû târih-i kitâb şehri Cumâdelâhiresi evâili ile müverraha ve zâbit-i mezbûr Mehmed Halife hat ve imzâsıyla mümzât ve hâtemi [ile] mahtûme temessük ibrâz edip, nazar olundukda, mezbûr Ahmed’in takrîr-i meşrûhuna muvâfık ve mutâbık bulunmağın ve hurûfu dahi kıbel-i şer‘den ketb olunup, yedine def‘ olundu. Hurrire fî 5 min Şa‘bâni’l-mu‘azzam li sene 1027. Şuhûdü’l-hâl: İbrahim Kâmil eş-şehîr Potuksârlı?, Mehmed Bey Kethüdâ-yı Nevrekob, Mehmed Çavuş [b.] Burak, Mustafa Çelebi b. ( ) Halife, Hüsam Halife Tezkire-i Halife, Ali Çelebi b. Hasan, Mehmed Abdi b. Davud ve Veli Bey b. Abdullah, Bekir b. Osman, Mustafa Çelebi b. Hidâyetullah, Mehmed b. Zeynî ve gayruhüm.