İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 403 Hüküm no: 606 Orijinal metin no: [71a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Mugan’ın kocası Kaya b. Mehmed’den muhâla‘a yoluyla boşandığı Mahmiye-i Galata tevâbi‘inden Kasımpaşa’da Seferikoz mahallesi sâkinelerinden cüsse ve sinni bülûğa mütehammil olduğu hâlde bülûğuna mu‘terife olan Emine bt. Mugan? nâm hâtun meclis-i şer‘de, zevci Kaya b. Mehmed mahzarında takrîr-i kelâm edip, mezbûr Kaya zimmetinde olan beş yüz akçe mehr-i müeccelimden ve nafaka-i iddetimden ferâğ etmek üzre mezbûr Kaya ile muhâla‘a eylediğimizden sonra, hukūk-ı zevciyyete müte‘allika olan de‘âvâdan bir birimizin zimmetin ibrâ ve ıskāt etdik dedikden sonra, mezbûr Emine’yi ikrâr-ı meşrûhunda merkūm Kaya dahi vicâhen ve şifâhen tasdîk ve vech-i sâbık üzre mezbûre Emine ile muhâla‘a edip, hukūk-ı zevciyyete müte‘allik de‘âvâdan bir birinin zimmetin ibrâ ve ıskāt eylediklerin tahkīk etmeğin, mâ hüve’l-vâki‘ bi’t-taleb [ketb] olundu. Hurrire fi’l-yevmi’l-âşir min Şa‘bâni’l-mu‘azzam li sene seb‘a ve ışrîn ve elf. Şuhûdü’l-hâl: Mustafa b. Cafer, Mehmed Çelebi b. el-Hâc Zeynî, Kadri b. Mehmed, Mustafa b. İnâm, Durak b. Abdi.