İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 404 Hüküm no: 607 Orijinal metin no: [71a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manastır’dan Mehmed b. Abdullah’ın üvey babası Mehmed Efendi b. Ahmed aleyhindeki alacak davası hususunda haksız olduğu Vilâyet-i Rumeli’de Manastır sâkinlerinden Mehmed b. Abdullah nâm âdem meclis-i şer‘-i kavîmde, üveyi babası olan Mehmed Efendi b. Ahmed muvâcehesinde üzerine da‘vâ edip, mûmâ-ileyh Mehmed Efendi benim yedimden bin iki yüz akçemi gasben ahz edip taleb etdiğimde, zikr olunan meblağ benim mülküm idiğini ikrâr dahi etmişdir. Suâl olunup alıverilmek taleb ederim dedikde, gıbbe’s-suâl merkūm Mehmed Efendi cevâbında, fi’l-vâki‘ zikr olunan akçeyi mücerred tatyîb-i hâtırımdan mezbûr üveyi oğlum Mehmed’indir deyû ikrâr etmiş idim. Lâkin ikrâr-ı meşrûhumda kâzib idim. İkrârımda kâzib değil idiğime yemîn eylesin deyip, üç def‘a yemîn teklîf olunup, her birinde nükûl etmeğin ve sâlifü’z-zikr min ba‘d bî-vech-i şer‘î mûmâ-ileyh Mehmed Efendi’ye ta‘arruzdan men‘ olunup, mâ hüve’l-vâki‘ gıbbe’t-taleb ketb olundu. Tahrîren fî evâili Şa‘bâni’l-mu‘azzam li sene seb‘a ve ışrîn ve elf. Şuhûdü’l-hâl: Fahrü’l-cüyûş İbrahim Çavuş [b.] Mehmed, Eyüb [b.] Mehmed, Mehmed b. Eyüb, Osman b. Abdullah ve gayruhüm.