İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 406 Hüküm no: 612 Orijinal metin no: [72a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müteveffa Şeyh Budak Efendi’nin mîrâsının vasiyetine uygun dağıtıldığı Mahmiye-i İstanbul’da Eski İmâret mahallesi sâkinlerinden Can Âlim demekle ma‘rûf olup bundan akdem vefât eden merhûm eş-Şeyh Budak Efendi b. Ali nâm müteveffânın ammîsi oğlu ve vârisi olan mefharü’l-kuzât Hasan Efendi b. Ali meclis-i şer‘-i hatîr-i lâzımü’t-tevkîrde, müteveffâ-yı mezbûrun tenfîz-i vesâyâsına vasiyy-i muhtârı olan umdetü erbâbi’t-tahrîr ve’r-rakam zübdetü ashâbi’t-takrîr ve’r-rakam Abdurrahman Efendi b. Mehmed muvâcehesinde ikrâr ve takrîr-i kelâm edip, bundan akdem müteveffâ-yı mezbûr hâl-i hayâtında yirmi bin akçe techîz ve tekfîn ve sâir mühimmât-ı lâzımesine ve zevcesi Belkıs Hâtuna mehr-i müecceli için otuz bin akçe ve sekiz bin dahi, cem‘an otuz sekiz bin akçe ve yirmi bir bin akçe mu‘takalarına vasiyyet edip, mûmâ-ileyh Abdurrahman Efendi vasiyy-i muhtârı olmakla ber-mûceb-i vasiyyet yirmi bin akçe techîz ve tekfîn ve sâir levâzımına harc ve sarf edip ve otuz sekiz bin akçe zevcesi mezbûre Hâtun’a ve yirmi bir bin akçe mu‘takalarına muhallefât-ı müteveffâ-yı mezbûrdan edâ ve teslîm etmiş, husûs-ı mezbûr benim dahi makbûlümdür, zikr olunan husûslara müte‘allik vechen mine’l-vücûh da‘vâ ve nizâ‘ım yokdur dedikde, mâ vaka‘a bi’t-taleb ketb olundu. Hurrire fî evâsıtı Şa‘bâni’l-mu‘azzam li sene seb‘a ve ışrîn ve elf. Şuhûdü’l-hâl: Mustafa Çavuş, Receb Halife b. Abdülkādir, el-Hâc Mustafa b. Mehmed, Mehmed Çelebi b. Murad, İbrahim b. Receb.