İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 406 Hüküm no: 611 Orijinal metin no: [71b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Molla Hüsrev Vakfı’na ait Bitpazarı’ndaki yanan odaların tamiri Mahmiye-i İstanbul’da merhûm Molla Hüsrev vakfına evlâd-ı vâkıfdan olup meşrûtiyyet üzre mütevellîyesi olan fahrü’l-muhadderât Ayşe Hâtun bt. Sadri’nin zevci ve husûs-ı âtî ikrâr[a] vekîli olup, mezbûreyi ma‘rifet-i şer‘iyye ile ârifeyn olan fahrü’l-kuzât İbrahim Efendi b. Bâli ve Mehmed Bey b. Abdullah şehâdetleri ile şer‘an vekâleti sâbite olan umdetü’l-kuzât es-Seyyid Mehmed Efendi b. es-Seyyid Ahmed Efendi meclis-i şer‘-i şerîfde, işbu ashâbü’l-kitâb Safer v. Evdik ve Bahadır v. Düğenci ve Yakob v. Marad ve Yasuf v. Sinân ve Cihanşah nâm üstâd neccârlar mahzarında takrîr-i kelâm edip, vâkıf-ı mezbûrun Bit pazarı çarşısında vâki‘ fevkānî ve tahtânî seksen altı bâb ergen odaları bi’l-külliye muhterik olup, müceddeden binâ olunmak lâzım gelmiş idi. Fevkānî olan her odanın tûl ve arzı beynimizde ma‘lûm birer kapı ve birer dolab ve ikişer penceresi olup ve tahtânî olan odaların önünde vasf ve kaddi ve tûl ve arzı indimizde ma‘lûm üç zirâ‘ dehliz ve mu‘tâd üzre birer kapı ve birer pencere olup, cümle kerestesi cânib-i vakıfdan olmak üzre mücerred neccâriyesi için mezbûrûn üstâdlara cânib-i vakıfdan her bir ayda üç bin akçe ücret vermek üzre cem‘an elli bin akçeye istîcâr ettik dedikde, zikr olunan üstâdlar dahi müceddeden binâ etmeğe vech-i meşrûh üzre nefislerini îcâr ettiklerine mu‘terif olup, binâya müte‘ahhid olduklarında, mâ vaka‘a bi’t-taleb ketb olundu. Tahrîren fî evâhiri Recebi’l-mürecceb li sene seb‘a ve ışrîn ve elf. Şuhûdü’l-hâl: Mustafa Dede b. Musa, Musa Çelebi b. İbrahim, Mahmud Çelebi, Mehmed b. Yusuf, Ahmed b. Abdullah, Mustafa b. Abdullah ve gayruhüm.