İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 409 Hüküm no: 617 Orijinal metin no: [72b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadri’nin boşadığı eşi Şahnisa Hanım’a borcu olmadığı Mahmiye-i Kostantıniyye mahallâtından İbrahim Paşa mahallesi sâkinelerinden Şahnisa bt. Mehmed nâm hâtun mahfil-i kazâda, sâbıkan zevci olan Kadri b. İbrahim nâm kimesne mahzarında üzerine da‘vâ edip, bundan esbak mezbûr Kadri zevcim iken beni tatlîk ettikde, merkūmun yedinde bin akçe kıymetli bir kırmızı atlas kaftanım ve bin akçe kıymetli üç aded serâser yastığım ve beş yüz akçe kıymetli bir serâser döşeğim, üç yüz akçe kıymetli bir kırmızı muhattam kuşağım ve altmış akçe kıymetli iki aded sahanım ve elli akçe kıymetli bir tencerem alıverilmesi matlûbumdur dedikde, gıbbe’s-suâl ve akībü’l-inkâr, müdde‘iyye-i mersûmeden da‘vâsını müsbite beyyine taleb olundukda, ityân-ı beyyineden izhâr-ı acz edip, mezbûr Kadri’nin eşyâ-yı mezbûre yedinde kalmadığına tahlîf olunmak matlûbumdur dedikde, gıbbe’l-istihlâf mezbûr Kadri dahi alâ mâ hüve’l-mes’ûl half billâhi’l-aliyyi’l-azîm etmeğin, mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî aşer min Şa‘bâni’l-mu‘azzam li sene seb‘a ve ışrîn ve elf. Şuhûdü’l-hâl: Ebûbekir b. Osman, Yusuf b. Dursun, Receb b. Abdülkādir, İbrahim b. Kasım, Murad b. Hüseyin.