İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 409 Hüküm no: 618 Orijinal metin no: [72b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühâni ve annesi Emine’nin kahveci Mustafa’ya hizmet karşılığı borçlarının ödendiği Mahmiye-i Kostantıniyye sâkinlerinden Mustafa b. İsmail nâm kahveci mahfil-i kazâda, bundan akdem fevt olan Minval b. Abdullah nâm kahvecinin sulbiye sagīre kızı Ümmühâni’nin vâlidesi olup, kıbel-i şer‘den mansûbe vasîsi olan Emine bt. Abdullah nâm hâtun tarafından tasdîk-i âtîye vekîl olup, hasm-ı şer‘î-i câhid mahzarında bimâ hüve tarîku’s-sübût şer‘an vekâleti sâbite olan Abbas Çelebi b. Ahmed mahzarında ikrâr-ı tâm ve takrîr-i kelâm edip, bundan akdem müteveffâ-yı mezbûrun zimmetinde karz-ı şer‘îden sekiz bin akçe ve kırk günlük hizmetim mukābelesinde yevmî kırkar akçeden bin altı yüz akçe ve beynimizde ma‘lûm İznik fincanı bahâsından dört yüz akçe ki, cem‘an on bin akçe hakkım olup, vefât etdikde müteveffâ-yı mezbûrun muhallefâtından vasiyy-i mezbûrun makbûzların taleb edip, ikāmet-i beyyine-i âdile ile isbât edip, hükm sadedinde iken sagīre-i mezbûreye nef‘an muslihîn tavassut ettikde, husûs-ı mezbûru dört bin akçeye inşâ’-i sulh ettiklerinde, ben dahi sulh-ı mezbûru kabûl ve bedel-i sulh olan meblağ-ı merkūmu müvekkile-i mezbûre yedinden alıp kabz edip, mâ‘adâsından merkūmetân Ümmühâni ve Emine’nin zimmetini ibrâ-i âm ile ibrâ ve ıskāt eyledim. Ba‘de’l-yevm meblağ-ı merkūma müte‘allik bi’z-zât ve bi’l-vâsıta benden da‘vâ sudûr eder ise inde’l-hükkâm mesmû‘a olmaya dedikde, gıbbe’t-tasdîk mâ hüve’l-vâki‘ bi’t-taleb ketb olundu. Hurrire fî evâili Şa‘bâni’l-mu‘azzam li sene seb‘a ve ışrîn ve elf. Şuhûdü’l-hâl: Seyyid Mehmed b. Seyyid Halil, Mustafa Bey b. Haydar Bey Kethüdâ-i Kahve kapanı, Mustafa b. Hüseyin el-Bevvâb, el-Hâc İbrahim b. Ebûbekir, Mehmed Çelebi b. Hasan Efendi, Hüseyin b. Ramazan.