İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 411 Hüküm no: 621 Orijinal metin no: [73a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi’nin mîrâsı şahitlik yapacak kişiler Husûs-ı âti’l-beyâna şâhidler olup, âhar diyâra müteveccih olan Ali Bey b. Abdullah ve Ahmed Bey b. Süleyman meclis-i şer‘-i kaviyyü’l-bünyânda fahrü’l-akrân Çâker Çavuş b. Abdülmennân ve Şaban b. Hüseyin mahzarlarında takrîr-i kelâm edip, İstanbul kazâsından munfasıl iken mün‘im bihâr-ı rahmet-i gafûr olan merhûm ve mağfûr Mustafa Efendi b. Bâli’nin alâ tarîki’l-inhisâr vârisi olup, hâlâ Mekke-i mükerreme kadısı olan kıdvetü’l-ulemâ’ zübdetü’l-fuzalâ Mehmed Efendi b. Mustafa eş-şehîr bi Davudzâde Efendi merhûm-ı mezbûrdan irs-i şer‘le kendiye intikāl eden Ayvalık Tire ve Birgi kazâlarında vâki‘, ma‘lûmü’l-hudûd menâzil ve değirmenleri ve çiftliği ve bahçeleri ve çiftlikde olan mevâşî ve ism-i mâl ıtlâk olunup kendiye âid olan eşyânın cümlesini vaz‘-ı yed edenlerden da‘vâ ve taleb ve ahz u kabza ve mürâfa‘a ve muhâsamaya medîne-i Tire sâkinlerinden olup ( ) kazâsından munfasıl olan Abdülhalîm Efendi b. Şah Mehmed’i kabûlüne mevkūf vekâlet ile bizim huzûrumuzda tevkîl etti. Husûs-ı mezbûre biz şâhidleriz şehâdet dahi ederiz. Lâkin biz âhar diyâra gitmekle edâ-i şehâdet müte‘azzir olmağın, her birimiz sâlifü’z-zikr Çâker Çavuş’u ve Şaban’ı vech-i meşrûh üzre istişhâd edip, tahmîl-i şehâdet ettik, varıp bizim lisânımızda minvâl-i muharrer üzre şehâdet etsinler dediklerinde, fer‘ân-ı mezbûrân dahi şehâdet-i mezbûreyi kabûl ve edâ-i şehâdete mütehammil ve müte‘ahhid olmağın, mâ hüve’l-vâki‘ gıbbe’t-taleb ketb olundu. Tahrîren fi’l-yevmi’l-hâmis min Şa‘bâni’l-mu‘azzam li sene seb‘a ve ışrîn ve elf. Şuhûdü’l-hâl: Murad b. Mehmed, Mustafa b. Hızır, Sinan b. Abdullah, Ali b. Abdullah, Mustafa b. Hamza.