Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 174 Hüküm no: 155 Orijinal metin no: [32b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un Ümmühani Hatun’un vakfından borç alması (istiğlâl) Hüccet-i istiğlâl Mahmiye-i İstanbul’da Yenibahçe kurbünde Karabaş mahallesi sâkinelerinden Âişe Hatun bt. Ali meclis-i şer‘-i şerîfde yine mahalle-i mezbûre sâkinelerinden olup kendi vakfına hâlâ mütevellî olan işbu râfi‘atü’l-kitâb Ümmühani Hatun bt. Abdullah tarafından husûs-ı âti’l-beyâna vekîl olup mezbûreyi ma‘rifet-i şer‘iyye ile ârifân olan Yusuf b. Abdullah ve İbrahim Çelebi b. Receb şehâdetleri ile vekâleti sâbite olan fahrü’l-eimme Abdi Efendi muvâcehesinde ikrâr ve takrîr-i kelâm edip mahalle-i mezbûrede vâki‘ bir tarafdan ba‘zan Hasan Çelebi mülkü ve bir tarafdan Emine Hatun mülkü ve bir tarafdan Mahmud Çelebi mülkü ve ba‘zan Haffâf Mustafa Çelebi tasarrufunda olan vakıf menzil ve ba‘zan Hazînedâr Mehmed Çelebi mülkü ve bir tarafdan tarîk-i âm ile mahdûd mülk menzilimi mâl-ı vakf-ı mezbûr ile mütevellîye-i mezbûra seksen esedî guruşa bi-tarîkı’l-istiğlâli’ş-şer‘î bey‘ ve teslîm, ol dahi mâl-ı vakf-ı mezbûr ile vech-i muharrer üzere iştirâ ve tesellüm edip semeni olan meblağ-ı mezbûr seksen esedî guruşu vekîl-i mezbûr Abdullah Efendi yedinden ahz u kabz eylediğimden sonra mütevellîye-i mezbûre menzil-i mezbûru ba‘de’t-tahliyeti’ş-şer‘iyye ve’t-tekābuzü’l-mer‘î târîh-i kitâbdan iki sene tamâmına dek sekiz esedî guruş ücret ile bana îcâr ve teslîm edip ben dahi istîcâr ve tesellüm ve kabûl eyledim dedikde, gıbbe’t-tasdîkı’ş-şer‘î yine mahalle-i mezbûre ahâlîsinden Hasan Efendi ile medyûn-ı mezbûrenin vâlidesi Fâtıma nâm hatun menzil-i mezbûrun derkine ve ücret-i lâzımesine her birimiz tarafeynden emr ü kabûlü hâviye kefâlet ile kefîl olduk dediklerinde mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min-Recebi’l-ferd li-sene ihdâ ve semânîn ve elf. Yusuf Efendi b. Mahmud, Ahmed Efendi el-imâm, Müezzinzâde Mehmed Çelebi b. Hasan, Hamza b. Ali, Osman Çelebi b. Ahmed.