Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 175 Hüküm no: 156 Orijinal metin no: [32b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un vefat eden kardeşi Mahmud Çelebi’nin terekesi hususunda diğer varis Ayşe Hatun ile anlaşması Hüccet-i münâsaha, Mahmiye-i İstanbul’da Neslişah Sultan mahallesi ahâlîsinden iken bundan akdem vilâyet-i Anadolu’da Üskübü kasabasında müsâfiren sâkin iken vefât eden Mahmud Çelebi b. Osman’ın verâseti zevce-i metrûkesi Âişe Hatun bt. Ömer ile li-ebin kız karındaşı Fâtıma’ya münhasıra ve tashîh-i meselesi dört sehmden i‘tibâr olunup sihâm-ı mezbûreden bir sehmi mezbûre Âişe’ye ve üç sehmi mezbûre Fâtıma’ya isâbet etdiği şer‘an mütehakkık oldukdan sonra tereke-i müteveffâ-yı mezbûra vâzı‘atü’l-yed olan işbu bâ‘isetü’l-kitâb mezbûre Âişe [33a] Hatun mahzarında bi’t-tav‘ ve’s-sâf ikrâr u i‘tirâf edip mûrisimiz müteveffâ-yı mezbûr Mahmud Çelebi’nin akār ve menkūl ve evânî-i nühâsiye ve gayr-ı nühâsiye ve esâs-ı beyt ve bi’l-cümle kalîl ü kesîr cemî‘ terekesinden sihâm-ı mezbûreden hissem olan üç sehm mukābelesinde mezbûre Âişe ile şerâit-i sıhhat-i sulhü hâvî ve mevâni‘den ârî bi-tarîkı’t-tehârüci’ş-şer‘î bin akçe üzerine sulh olup ve bedel-i sulh olan meblağ-ı mezbûr bin akçeyi mezbûre Âişe Hatun yedinden ahz u kabz edip müteveffâ-yı mezbûrun terekesine müte‘allıka âmme-i da‘vâdan mezbûre Âişe Hatun ile her birimiz âharın zimmetini ibrâ-i âmm-ı kâtı‘u’n-nizâ‘ ile ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin min-Recebi’l-mürecceb li-sene ihdâ ve semânîn ve elf. Şuhûdü’l-hâl: Şükrullah Bey b. Mustafa Abdi Çelebi b. Hüseyin, Mustafa Çelebi b. el-Hâc Ahmed, İbrahim Çelebi b. Mehmed, Ebubekir Çelebi b. Hüseyin.