.:: İstanbul Kadı Sicilleri ::.


İstanbul Mahkemesi 3 Numaralı Sicil (H.1027/ M. 1618)
cilt: 13, sayfa: 417
Hüküm no: 631
Orijinal metin no: [74b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vahani ile dükkânından para alınan Polimizoni’nin sulh olduğu

Mahmiye-i Kostantıniyye’den Balıkpazarı’nda sâkin Polimizoni v. Yani nâm zimmî meclis-i şer‘-i şerîfde, hâmil-i hâze’l-kitâb Kumkapısı kurbunda sâkin olan Vahani v. Yani nâm zimmî muvâcehesinde takrîr-i kelâm edip, bundan akdem hizmetkâr olan Yani v. Nikola nâm zimmî dükkânım içinde on sekiz bin akçemi ahz u kabz ve firâr ettikde, mezbûr Vahani rast gelip, mezbûr Yani’nin yedinden meblağ-ı mezbûrun dört bin akçesin ahz u kabz ve gasb etmiş deyû merkūm Vahani’den gâsıb-ı gâsıb olmağile taleb ve da‘vâ ettikde, mezbûr Vahani inkâr etmekle, mâ beynimizde nizâ‘-ı kesîr vâki‘ olmuş idi. El-hâletü hâzihî muslihûn tavassutu ile sekiz yüz akçe vermek üzre beynimizi ıslâh ve tevfîk ettiklerinde, ben dahi sulh-ı mezbûru kabûl ve bedel-i sulh olan meblağ-ı mezbûr sekiz yüz akçeyi merkūm Vahani yedinden bi’t-tamâm ahz u kabz edip, husûs-ı mezbûre müte‘allik âmme-i da‘âvâdan mezbûr Vahani’nin zimmetini ibrâ-i âmm-ı kātı‘ü’n-nizâ‘ ile ibrâ etdim. Ba‘de’l-yevm mazmûn-ı kitâba muhâlif benden bi’z-zât veya vekîlimden bi’l-vâsıta da‘vâ sâdıre olursa inde’l-hükkâmi’l-kirâm mesmû‘a olmaya dedikde, ba‘de’t-tasdîk ve’l-kabûl, mâ vaka‘a bi’t-taleb ketb olundu. [Hurrire] fi[‘t-târihi’]l-mezbûr.


Şuhûdü’l-hâl: Mustafa [b.] Hamza, Mustafa b. Abdullah, Abdullah [b.] İbrahim, Yusuf b. Süleyman ve gayruhüm.