İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 416 Hüküm no: 630 Orijinal metin no: [74b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tatavlalı Petro ve Yorgi’nin koyunlarını müştereken satın Petro, Yorgi, İstemad ve Dimo’nun birbirlerine kefîl oldukları Medîne-i Ebâ Eyyûb el-Ensârî -aleyhi’r-rahmeti’l-meliki’l-bârî- mahallâtından Halil Paşa mahallesi sâkinlerinden Yoğurtçu Ahmed Paşa b. Abdullah meclis-i şer‘-i şerîfde, mahmiye-i Galata müzâfâtından Tatavla nâm karye sâkinlerinden Petro v. Yani ve Yorgi v. Mihail mahzarında üzerine takrîr-i da‘vâ edip, bundan esbak benden mezbûr Petro ve Yorgi ve İstemad v. Dimo ve Uzun Todori v. Miho nâm zimmîler, her re’si yüz yirmişer hesâbı üzerine iki yüz otuz re’s koyunu, cem‘an yirmi yedi bin altı yüz akçeye ber vech-i iştirâk iştirâ ve kabz edip, her biri âharın zimmetine lâzım gelen meblağa emr ve kabûlü hâviye kefâlet ile kefîl olmuşlar idi. Hâlâ mezbûrlardan kefâletleri hasebi ile zikr olunan yirmi yedi bin altı yüz akçenin suâl olunup alıverilmesin[i] taleb ederim dedikde, gıbbe’s-suâl merkūmân Petro ve Yorgi ve İstemad ve Uzun Todori, her re’si yüz yirmişer akçe hesâbı üzre iki yüz otuz re’s koyunu, cem‘an yirmi yedi bin altı yüz akçe[ye] ber vech-i iştirâk iştirâ ve kabz edip, her biri âharın zimmetine lâzım gelen meblağa emr ve kabûlü hâviye kefâlet ile kefîl oldular dedikde, gıbbe’s-suâl merkūmân Petro ve Yorgi bi’l-külliye inkâr ile cevâb verip, müdde‘î-i mezbûrdan da‘vâsını müsbite beyyine taleb olundukda, mahalle-i mezbûreden Bayram b. Abdülkerim ve Ahmed b. Abdürrahim nâm kimesneler meclis-i şer‘de li ecli’ş-şehâde hâzırân olup gıbbe’l-istişhâd, fi’l-vâki‘ müdde‘î-i mezbûrda mezbûr Petro ve Yorgi ve İstemad ve Uzun Todori her re’s yüz yirmişer akçe hesâbı üzre iki yüz otuz re’s koyun yirmi yedi bin altı yüz akçe ber vech-i iştirâk iştirâ ve kabz edip, her biri âharın zimmetine lâzım gelen meblağa kefîl oldular deyû şehâdet ettiklerinde, şehâdetleri hayyiz-i kabûlde vâki‘ olup, mâ vaka‘a ketb olundu. Şuhûdü’l-hâl: Mustafa b. Abdullah, Mehmed b. Abdullah et-Tâcir, Diğer Mehmed b. Abdullah, Mustafa b. Abdullah, Musli Şah b. Hasan, Mustafa b. Mehmed, Ahmed b. Hasan ve gayruhüm.