İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 423 Hüküm no: 643 Orijinal metin no: [76a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Nikola’nın kaybolmasında Polimizoni’nin alâkasının olmadığı Mahmiye-i İstanbul’da Kumkapısı sâkinlerinden Kiryako v. Nikola nâm zimmî meclis-i şer‘de, Polimizoni v. Apostol nâm zimmî mahzarında ikrâr ve takrîr-i kelâm edip, bundan akdem li ebeveyn karındaşım olup gāib olan Yani v. Nikola nâm zimmîyi, mezbûr Polimizoni gāib etmişdir deyû mezbûr Polimizoni’den da‘vâ etmiş idim. Hâlâ mezbûr Polimizoni’nin husûs-ı mezbûrdan alâkası olmadığı ma‘lûmum olup, zikr olunan husûsa müte‘allik da‘vâdan mezbûrun zimmetini ibrâ ve ıskāt etdim. Ba‘de’l-yevm sâlifü’z-zikr husûsa müte‘allik bi’z-zât ve bi’l-vâsıta da‘vâ dahi sudûr ederse lede’l-hükkâmi’l-kirâm mesmû‘a ve makbûle olmaya dedikde, mâ vaka‘a bi’t-taleb ketb olundu. Hurrire fi’l-yevmi’l-hâdî ve’l-ışrîn min Şa‘bâni’l-mu‘azzam li sene seb‘a ve ışrîn ve elf. Şuhûdü’l-hâl: Mustafa b. Hamza, Yusuf b. Bayram, Mustafa b. Cafer.