İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 422 Hüküm no: 642 Orijinal metin no: [76a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kestel Vakfı’na ait odanın tasarrufunun Hasan b. Mehmed’e ait olduğu Mahmiye-i İstanbul’da ( ) mahallesi sâkinlerinden râfi‘ü’l-kitâb Hasan b. Mehmed meclis-i şer‘de Mahmud b. Ali mahzarında üzerine da‘vâ edip, bundan akdem mahmiye-i mezbûrede Kestel vakfından Kazasker Hamamı kurbunda vâki‘ iki tarafı yine vakf-ı mezbûr ve bir tarafı tarîk-i âm ve bir tarafı saray duvarıyla mahdûd olan bir bâb odanın hakk-ı tasarrufunu icâre-i mu‘accele ve müeccele mutasarrıfı olan Sefer b. Halil nâm kimesne beş bin akçeye mütevellî-i vakf olan ( ) ma‘rifeti ile bana tefvîz edip, ben dahi kabz ve kabûl edip, meblağ-ı mezbûr beş bin akçeyi mezbûr Sefer’e edâ ve teslîm edip, tasarrufumda iken mezbûr Mahmud oda-i mezbûreye bî-vech-i şer‘î vaz‘-ı yed edip, hakk-ı tasarrufumu tasarrufa mâni‘ olur, suâl olunup yed-i âdiyesi def‘ olunmak taleb ederim [dedikde], gıbbe’s-suâl mezbûr Mahmud cevâbında, bundan esbak sâbıku’z-zikr odayı sen iddi‘â ettiğin zamândan sonra mezbûr Sefer’den dört bin beş yüz akçeye tefevvüz edip vaz‘-ı yed etdim idi. Mezbûr Hasan’ın minvâl-i meşrûh üzre benden mukaddem tefvîz ve tefevvüz ma‘lûmum değildir deyû, mezbûr Hasan’ın kendiden mukaddem mütevellî ma‘rifeti ile tefevvüzü inkâr edip, müdde‘î-i mezbûrdan takrîrine muvâfık beyyine taleb olundukda, udûlden el-Hâc Mehmed b. Mehmed ve el-Hâc Mehmed b. Ali ve Ali b. Ramazan li ecli’ş-şehâde meclis-i şer‘a hâzırûn olup istişhâd olunduklarında, fi’l-vâki‘ bizim huzûrumuzda sâbıku’z-zikr odanın hakk-ı tasarrufu merkūm Sefer [ve] mezbûr Hasan’a mütevellî-i sâbıku’z-zikr ma‘rifeti ile tefvîz edip, ol dahi tefevvüz ve kabûl ettikden sonra mukābele-i tefvîzde beş bin akçe alıp kabz etti. Bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde, şehâdetleri hayyiz-i kabûlde vâkı‘a olup, mütevellî-i mezbûr dahi hâl minvâl-i meşrûh üzre olduğun tasdîk edip, mezbûr Mahmud’un yed-i âdiyesi def‘ olunup, merkūm Hasan’a teslîm ile ilzâm olundu. Hurrire fi’t-târihi’l-mezbûr. Şuhûdü’l-hâl: Ali b. Ramazan, İsmail b. Mehmed, Süleyman b. Ahmed, el-Hâc Hüseyin b. Osman.