İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 424 Hüküm no: 645 Orijinal metin no: [76a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen İbrahim b. Abdullah’ın Kovacı Dede vakfına borcunun ödendiği Havâss-ı Kostantıniyye müzâfâtından Çiftalan nâm karye sâkinlerinden iken bundan akdem fevt olan İbrahim b. Abdullah nâm kimesnenin sulbiye sagīre kızı Ayşe’nin vâlidesi olup, kıbel-i şer‘den mansûbe vasîsi olan Emine bt. Musli nâm hâtun, mahfil-i kazâda mahmiye-i Kostantıniyye’de Kovacı Dede vakfına mütevellî olan hâmilü hâze’l-kitâb Kâmyâb b. Abdullah mahzarında takrîr-i kelâm ve ta‘bîr ani’l-merâm kılıp, müteveffâ-yı mezbûrun karye-i mezbûrede vâki‘ bir tarafı Mustafa b. Abdullah mahallesi avârızına ve bir tarafı Asiye bt. Abdullah ve bir tarafı Mehmed b. Ahmed mülkleriyle ve taraf-ı râbi‘i tarîk-i âm ile mahdûd olup, bir bâb tahtânî ve bir bâb fevkānî evleri ve ahırı ve avluyu müştemil olan menzil mülkü olup, ba‘de vefâtihî sagīre-i mezbûreye intikāl etmişdi. Lâkin müteveffâ-yı mezbûrun vakf-ı merhûma cihet-i karzdan bin akçe deyni olup, şuhûd-ı udûl ile benim muvâcehemde sâbit olmakla hükm olunup, müteveffâ-yı mezbûrun menzil-i merkūmdan gayrı terekesi olmamakla, zarûrî deyn için bey‘ olunmak lâzım gelmeğin, Sûk-ı sultânî’de muvakkı‘-ı kitâb izniyle kirâren ve mirâren müzâyede olunup, ba‘de inkıtâ‘i’r-râğbe mezbûr Kâmyâb üzerinde iki bin nakd râyic fi’l-vakt fıddî akçede hakk-ı karâr ile karâr edip, ziyâde ile tâlib-i âhar zuhûr etmemeğin, menzil-i merkūmu mezbûr Kâmyâb’a vesâyeti hasebiyle meblağ-ı mezkûr iki bin akçeye bey‘-i kat‘î ile bey‘ edip, bedel-i mezbûrdan bin akçesin ahz u kabz edip, bâkī kalan bin akçesin müteveffâ-yı merkūmun vakf-ı mezbûra olan bin akçe deynine takas eyledim. Ba‘de’l-yevm menzil-i merkūm mezbûr Kâmyâb’ın mülk-i müşterâsıdır. Keyfe mâ yeşâ mutasarrıf olsun dedikde, gıbbe’t-tasdîk mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis ve’l-ışrîn min Şa‘bâni’l-mu‘azzam li sene seb‘a ve ışrîn ve elf. Şuhûdü’l-hâl: Şaban Halife b. Ahmed el-imâm, Hasan b. Mehmed, el-Hâc İbrahim b. Abdullah, Şaban b. Abdullah, İbrahim b. Receb.