İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 425 Hüküm no: 648 Orijinal metin no: [76b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hamza Bey b. Yusuf ile Ahmed Subaşı b. Abdullah’ın bağ satış anlaşmasını fesh ettikleri Dergâh-ı âlî bevvâblarından fahrü’l-akrân Hamza Bey b. Yusuf meclis-i şer‘de, cezîre-i Kıbrıs’da vâki‘ Baf nâm kasaba sâkinlerinden zevi’l-emâsil Ahmed Subaşı b. Abdullah muvâcehesinde bi’t-tav‘i’s-sâf ikrâr ve i‘tirâf edip, bundan akdem mûmâ-ileyh Ahmed Subaşı’nın silk-i mülküne dâhil olup, mahrûse-i Üsküdar’a tâbi‘ İstavros nâm karyede vâki‘ bir tarafı Dimitraki v. Kosta bağı ve bir tarafı Hıristodori v. Dimitraci bağı ve bir tarafı Yanaki v. Dimitraki bağı ve bir tarafı tarîk-i âm ile mahdûd olan bir kıt‘a mülk bağını, seksen bin akçeye şirâ-i şer‘î ile mûmâ-ileyh Ahmed Subaşı’dan iştirâ edip, tarafeynden rızâlarımız ile tekābuz bedelin vâki‘ olmuş idi. Hâlâ ikimizin rızâları ile bey‘-i mezbûru fesh ve ikāle edip, semen-i mezbûr seksen bin akçeyi mezbûr Ahmed Subaşı yedinden bi’t-tamâm alıp kabz edip, mezkûr bağı yine kendiye teslîm etdim. Ba‘de’l-yevm mârrü’z-zikr bağ kemâ-kân silk-i mülkünde dâhildir, benim kat‘â alâkam yokdur, hasbemâ yehtâr mutasarrıf olsun dedikde, gıbbe’t-tasdîk mâ vaka‘a bi’t-taleb sebt olundu. Hurrire fî evâhiri Şa‘bân sene [10] 27. Şuhûdü’l-hâl: Ahmed b. el-kadı, Abdi Efendi b. ( ), Cafer Efendi b. ( ) el-mülâzım, Ali b. Memi.