İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 426 Hüküm no: 649 Orijinal metin no: [76b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hoca Sinan vakfının ev ve müştemilatının tamirine izin verildiği Mahmiye-i İstanbul’da Elvanoğlu mahallesi sâkinlerinden eş-Şeyh Mustafa Efendi b. Ali el-Endülüsî meclis-i şer‘de takrîr-i kelâm edip, mahalle-i mezbûrede vâki‘ bir tarafı Hoca İshak Vakfı ve bir tarafı Elvanoğlu mescidi duvar[ı] ve iki tarafı tarîk-i âm ile mahdûd olup, büyût-ı müte‘addideyi müştemil olan menzilin süknâsını, bundan akdem vefât eden merhûm Hoca Sinan sulehâ’-i ulemâya vakf ve şart etmekle, ber mûceb-i şart-ı vâkıf menzil-i mezkûrda sulehâ’-i ulemâdan evvelâ Bâli Efendi b. Üveys sâkin iken, mürûr-ı şuhûr ve kürûr-ı [eyyâm] ile menzil-i mezbûrun bir bâb odası ve bir hamamı ve bir duvarı bi’l-külliye münhedim olmakla, müceddeden binâ olunmağa cânib-i vakfda mâl-ı mu‘ayyen dahi olma[dı]ğın merhûm Bâli Efendi izn-i şer‘-i mütevellî ile kendi mâlı ile nefsi için müceddeden zikr olunan odayı ve hamamı ve duvarı binâ edip, ba‘de zamân merkūm Bâli Efendi vefât etmekle menzil-i mezbûr ve tevliyyeti dahi bana tevcîh olundukda, müteveffâ-yı mezbûr Bâli Efendi’nin mâlı ile binâ eylediği ebniye-i merkūme irs-i şer‘î ile veresesine intikāl etmeğin, verese-i merkūme zikr olunan ebniyeyi on bin dört yüz akçeye bana bey‘ ettiklerinde, nice zamân menzil-i mezbûrda sâkin olurken, mürûr-ı eyyâm ile menzil-i mezbûr harâbe ve sakf ve cüdrânı mâ’il-i turâb olmakla, tevliyyet-i mahkiyem hasebiyle kendi mâlım ile müceddeden dört bâb oda ve bir mutfak ve vakf iki bâb oda ve dört duvar ve tuğla döşeme binâ etmek ve bir musandara ve bir pencere ve bir hamam meremmet etmek murâd ederin, cânib-i şer‘den ehl-i hibre ve bî-garaz Müslimîn ile üzerine varıp, ne mikdâr akçe vefâ eder tahmîn-i sahîh ile tahmîn olunup, savb-ı şer‘den binâya izin taleb ederim dedikde, kıbel-i şer‘den Mevlânâ Receb Efendi ve hâssa mi‘mârlarından Üstâd Ali b. Abdullah irsâl olunup, zeyl-i kitâbda mastûrü’l-esâmi olan bî-garaz Müslimîn ile mahall-i mezbûre varıp, müşâhede ve mesâha ettiklerinde zikr olunan odaların birinin sakfı tûlen on zirâ‘ ve arzan dokuz zirâ‘ bi hesâb-ı şatrancî doksan zirâ‘ olup, her zirâ‘ı on beşer akçeden üç yüz elli akçe ve her zirâ‘ı on beşer akçeden dokuz zirâ‘ ve arzan sekiz zirâ‘ bi hesâb-ı mezbûr altmış üç zirâ‘ evlek tuğla döşeme yedi yüz elli akçe ve tûlen otuz altı zirâ‘ ve kadden altı zirâ‘ bi hesâb-ı mezbûr iki yüz on altı zirâ‘ olan duvara her zirâ‘ı dörder akçeden sıvasıyla sekiz yüz altmış dört akçe ve ikişer yüz akçeden iki kapı ve dört yüz akçe ve tûlen yirmi yedi zirâ‘ arzan on altı zirâ‘ bi hesâb-ı mezbûr iki yüz kırk iki zirâ‘ olan odaya her zirâ‘ı beşer akçeden bin iki yüz on akçe ve def‘a tuğla döşemeye ve bir pencere ve bir musandara ve bir mutfak meremmetine dört bin akçe ve def‘a iki oda meremmetine iki bin akçe ve bir hamam meremmetine üç bin akçe ve iki merdivene ikişer yüz akçeden dört yüz, cem‘an on dört bin üç yüz seksen akçe ancak vefâ eder, meblağ-ı mezbûrdan noksan ile imâret ve meremmet mümkün değildir deyû, tahmîn-i sahîh ile tahmîn ettikleri, mevlânâ-yı mezbûr mahallinde tahrîr mahfil-i kazâda ihbâr etmeğin, mûmâ-ileyh eş-Şeyh Mustafa Efendi ber vech-i muharrer üzre imâret ve meremmete izin verilip, mâ vaka‘a gıbbe’t-taleb ketb olundu. Fî evâhiri Şa‘bân li sene seb‘a ve ışrîn ve elf. Şuhûdü’l-hâl: Abdullah b. Abdülhalîm, İsmail Efendi b. Hüseyin, Mehmed b. Kaya Çelebi, İbrahim Bey b. Bayram.