İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 428 Hüküm no: 651 Orijinal metin no: [77a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Borçlu olarak ölen İmre’nin evinin açık artırma ile Sultana bt. Mihail’e satıldığı Mahmiye-i Kostantıniyye mahallâtından Mirahor mahallesinde sâkin iken bundan akdem mürd olan İmre v. Yani nâm ermeninin sulbiye kızları Tokadin ve Roşan nâm sagīrelere kıbel-i şer‘den mansûb vasî olan Papa Karagöz v. Kırıni nâm zimmî meclis-i şer‘de, sagīretân-ı mezbûretânın vâlideleri olan Sultana bt. Mihal nâm ermeniye mahzarında bi’l-vesâye takrîr-i kelâm edip, hâlik-i merkūmun mahalle-i merkūmede vâki‘ bir tarafı Ellez v. Tanrıvermiş ve bir cânibi İstemad v. ( ) ve cânibeyni tarîk-i hâs ve âm ile mahdûd olup, üç bâb fevkānî evleri ve mahzeni ve sofayı ve fırını ve kenîfi ve eşcâr-ı müsmire hadîkayı müştemil olan menzil mülkü olup, ba‘de vefâtihî sagīretân-ı mezbûretâna intikāl etmişdi. Lâkin merkūm İmre medyûnen mürd olmakla, menzil-i merkūmdan gayri terekesi olmamakla, zarûreten deyn için bey‘ olunmak lâzım gelmeğin, hâkim-i muvakkı‘-i’l-kitâb izniyle Sûk-ı Sultânî’de mirâren müzâyede olunup, ba‘de inkıtâ‘i’r-rağbe mezbûre Sultana üzerinde yirmi bin nakd râyic fi’l-vakt fıddî akçede hakk-ı karâr ile karâr edip, ziyâde ile tâlib-i âhar zuhûr etmemeğin, menzil-i merkūmu vesâyet-i mahkiyem hasebiyle merkūme Sultana’ya meblağ-ı mezkûr yirmi bin fıddî akçeye bey‘-i kat‘î ile bey‘ edip, kabz-ı semen ve tesellüm-i mebî‘ eyledim. Ba‘de’l-yevm menzil-i merkūm mesfûre Sultana’nın mülk-i müşterâsıdır. Keyfemâ teşâ’ mutasarrıfe olsun dedikde, gıbbe’t-tasdîk mâ hüve’l-vâki‘ bi’t-taleb ketb olundu. Hurrire fî evâhiri Şa‘bâni’l-mu‘azzam li sene seb‘a ve ışrîn ve elf. Şuhûdü’l-hâl: Mehmed b. Ali el-imâm, Mehmed b. Mustafa el-müezzin, Mustafa b. Abdi, Hasan b. Ahmed, Ahmed b. Musa.