Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 176 Hüküm no: 158 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un Rus asıllı cariyesi Ferruh’u vasiyetle azat etmesi Husûs-ı âti’l-beyânın mahallinde tahrîri iltimâs olunmağın savb-ı şer‘den Mevlânâ İbrahim Efendi b. Şa‘bân irsâl olunup ol dahi fahrü’l-muhadderât Fâtıma Hanım bt. Mehmed Ağa’nın mahmiye-i İstanbul’da Molla Şeref mahallesinde vâki‘ menziline varıp zeyl-i kitâbda muharrerü’l-esâmî olan Müslimîn huzûrunda akd-i meclis-i şer‘-i şerîf etdikde mûmâ-ileyhâ Fâtıma Hanım zâtını ma‘rifet-i şer‘iyye ile ârifân mahalle-i mezbûre sükkânından Mahmud Efendi b. Şa‘bân ve İbrahim Efendi b. Derya nâm kimesneler ta‘rîfleri ile mu‘arrefe oldukdan sonra meclis-i ma‘kūd-ı mezbûrda ikrâr ve takrîr-i kelâm edip bana rıkkını mu‘terife olan işbu uzun boylu açık kaşlı, elâ gözlü Rusiyyetü’l-asl bâ‘isetü hâze’l-kitâb Ferruh bt. Abdullah nâm câriye-i memlûkemi tedbîr-i mutlak ile müdebbere eyledim vaktâki kazâ-i nahb etdiğimde mezbûre Ferruh sülüs malımdan âzâd olsun dedikde gıbbe’t-taleb husûs-ı mezbûru Mevlânâ-yı mezbûr mahallinde tahrîr ba‘dehû ma‘an irsâl olunan İbrahim Çelebi b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Recebi’l-mürecceb li-sene ihdâ ve semânîn ve elf. Şuhûdü’l-hâl: Himmet Efendi b. Mehmed el-müezzin, Hasan Ağa b. Abdullah, Ahmed Ağa b. Nasuh, Ahmed Çelebi b. Mustafa, Hayrullah Ağa b. Mehmed Ağa.