Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 175 Hüküm no: 157 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe’nin Rus asıllı cariyesi Mülayim’i azat etmesi Mahmiye-i İstanbul’da Aksaray kurbünde Camcı Ali mahallesinde sâkin Ahmed Beşe b. Nasuh nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de ikrâr ve takrîr-i kelâm edip bana rıkkını mu‘terife olan işbu orta boylu açık kaşlı elâ gözlü Rusiyyetü’l-asl bâ‘isetü hâze’l-kitâb Mülayim bt. Abdullah nâm câriyemi hasbeten li’llâhi’l-hallâk ve taleben li-merzâti’r-rabbi’r-rezzâk malımdan tahrîr ü i‘tâk ve zümre-i harâir-i asliyâta idrâc ü ilhâk eyledim, ba‘de’l-yevm mevsûfe-i mezbûre Mülayim sâir harâir-i asliyât gibi hürre olup mevâlî için sâbit olan hakk-ı velâdan gayrı üzerinde hakkım kalmadı dedikde mâ-vaka‘a bi’t-taleb ketb olundu. Fi’l-yevmi’s-sâlis min-Recebi’l-mürecceb li-sene ihdâ ve semânîn ve elf. Şuhûdü’l-hâl: Süleyman Çelebi b. Abdullah, Ahmed Çelebi b. Mustafa, İbrahim Çelebi b. Mehmed, Molla Himmet b. el-müezzin, Şükrullah Bey b. Mustafa.