İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 430 Hüküm no: 656 Orijinal metin no: [77b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen kızı Raziye’nin, hisselerini Hemraz bt. Abdullah’a sattığı Mahmiye-i İstanbul’da Davudpaşa kurbunda İbrahim Ağa odalarında sâkin iken bundan akdem fevt olan Dede Bâli nâm kimesnenin sulbiye kebîre kızı Raziye nâm hâtun meclis-i şer‘de, işbu sâhibetü’l-kitâb Hemrâz bt. Abdullah nâm hâtun mahzarında takrîr-i kelâm ve ta‘bîr ani’l-merâm kılıp, müteveffâ-yı mezbûrun vârisi sulbiye kızları olduğumuz ecilden bana ve li eb hemşîrem Ümmü Gülsüm [olup], merkūme Ümmü Gülsüm dahi fevt olup vâlidesi ( ) nâm hâtû[n] ile li eb kız karındaşı olduğum ecilden beni terk edip, verâseti ikimize münhasıra oldukda, muhallefâtından olup Kocaderesi nâm mevzi‘de vâki‘ bir tarafı arz-ı hâliye ve bir tarafı Osman b. İsmail ve bir tarafı Hacı Rıdvan b. Abdullah ve bir tarafı Osman b. Memi mülkleriyle mahdûd olan mülk bahçesi münâsaha tarîkiyle on sehim olup, iki sehmi merkūme Ümmü Gülsüm’ün vâlidesine ve sekizi bana intikāl ettikde, zikr olunan sekiz sehim hisse-i şâyi‘amı merkūme Hemrâza yedi bin nakd râyic fi’l-vakt akçeye bey‘ edip, kabz-ı semen ve tesellüm-i mebî‘ eyledim. Ba‘de’l-yevm zikr olunan sekiz sehim hisse-i şâyi‘am merkūme Hemrâz’ın mülküdür. Keyfemâ yeşâ’ ve yahtâr musatarrıfe olsun dedikde, gıbbe’t-tasdîk mâ vaka‘a bi’t-taleb ketb olundu. Hurrire fî evâhiri Şa‘bâni’l-mu‘azzam sene seb‘a ve ışrîn ve elf. Şuhûdü’l-hâl: Eyvan b. Abdullah, Süleyman b. Hızır, Mustafa b. Mehmed, Mehmed b. ( ), Hasan b. Abdullah.