İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 430 Hüküm no: 657 Orijinal metin no: [77b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vakıf mütevellisine İbrahim Paşa hamamını iyi kiracı bulması için tenbihde bulunulduğu Mahmiye-i İstanbul’da vâki‘ İbrahim Paşa hamamının müste’cir-i olan Hızır Beşe b. İlyas nâm yeniçeri[yi] ehl-i mahalle meclis-i şer‘a ihzâr ettiklerinde, fahrü’l-cüyûş Halebli Mehmed Çavuş ve Kasım Halîfe b. Pîrî el-imâm ve Rüstem b. Veli ve Mustafa Efendi b. Hasan ve Osman b. Musa el-müezzin ve sâir ehl-i mahalle bi’l-muvâcehe takrîr-i kelâm edip, mezbûr Hızır Beşe hevâ üzredir ehl ü iyâlimiz hamama vardıkca müte’ezzî olurlar, şahs-ı mezbûr mü’temen değildir, birkaç kere avratlar hamamı kapısında nisvân içinden çıktığını gördük, haremât-ı Müslimîn ile muhtelit olur, sâbıkan dahi Hayreddin Paşa hamamından bu töhmet ile ihrâc olunmuşdur, töhmet-i sâbıkası vardır ve bi’l-cümle mezbûrun hamamcı olduğu marzîmiz değildir dediklerinde, merkūm Hızır Beşe isnâd ettikleri etvâr-ı nâ-hemvâr ile ittisâfı inkâr edip, bana iftirâdır dedikden sonra bi’t-tav‘ ve’r-rızâ ben hamam-ı mezbûrdan fâriğ olup, icâreyi fesh ederin, hemen bana hamama bir tâlib bulsunlar bana ziyâde ve cânib-i vakfa zarar ve hüsrân müterettib olmasın dedikde, mütevellî-i vakf olan fahrü’l-akrân Mahmud Bey b. Abdi meclise ihzâr olunup, cânib-i vakfa zarar ve noksan ve mezbûre gadr-i fâhiş ve hüsrân gelmemek üzre bir müste’cir-i sâlih bul deyû tenbîh olundukda, kaziyye bi’t-taleb ketb olundu. Hurrire fî evâili Şa‘bâni’l-mu‘azzam li sene seb‘a ve ışrîn ve elf. Şuhûdü’l-hâl: Mehmed Bey b. Ömer, Mustafa Ağa, el-Hâc Ali b. Abdi ve gayruhüm.