İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 437 Hüküm no: 668 Orijinal metin no: [79a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad b. Abdullah’ın Rus asıllı câriyesini Kamer bt. Hüseyin’e satışından dönüş olmadığı Murad b. Abdullah nâm kimesne meclis-i şer‘de, mahmiye-i İstanbul’da Cezerî Kasım Paşa mahallesi sâkinelerinden Kamer bt. Hüseyin nâm hâtun mahzarında üzerine da‘vâ edip, bundan akdem mezbûreye hâzır bi’l-meclis olan açık kaşlı elâ gözlü Rûsiyyetü’l-asl Bâdısabâ bt. Abdullah nâm câriyemi, yedi bin akçeye bey‘-i bâtt-ı sahîh-i şer‘î ile bey‘ edip yedine teslîm etmiş idim. Lâkin mesfûre Kamer Hâtun ma‘sere olmadığını istimâ‘ etdim bey‘-i mezbûru fesh eyleyip câriye-i mezbûremi alıverilmek murâd ederim suâl olunsun dedikde müdde‘î-i mezbûrun bir mesned-i şer‘îsi olmayıp tashîh-i da‘vâ edemeyip dâ‘vâsı fâside olmağın suâl ve cevâb müterettibe olmadığı ecilden da‘vâdan mezkûre istimâ‘ olunmayıp, mâ vaka‘a bi’t-taleb ketb olundu. Hurrire fi’l-yevmi’l-âşir min Ramazâni’l-mübârek sene seb‘a ve ışrîn ve elf. Şuhûdü’l-hâl: El-Hâc Ali b. Abdullah, Eyüb b. Mehmed, Ahmed b. Şehbaz, İsmail [b.] ( )