İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 439 Hüküm no: 673 Orijinal metin no: [79b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice Hâtun’un, Aynî Hâtun Vakfı’na borcu karşılığı evinin rehinden çıkartıldığı Mahmiye-i İstanbul’da vâki‘ Aynî Hâtun vakfına bi’l-fi‘il mütevellî olan işbu râfi‘ü’l-kitâb Ali Çavuş b. Hasan meclis-i şer‘de, mahmiye-i mezbûrede Tercüman Yunus mahallesi sâkinelerinden Hatice Hâtun bt. Muhyiddin tarafından husûs-ı âti’l-beyânı ikrâra ve müvekkilesinin mâlından edâ-i deyne vekîl olup, vekâlet-i mezbûreyi ma‘rifet-i şer‘iyye ile ârifeyn olan şuhûd ile sâbite olan Ruhi Mehmed Çelebi b. Mustafa mahzarında mezbûrenin üzerine da‘vâ edip, bundan akdem mâl-ı vakf-ı mezbûrdan mezbûre Hatice Hâtun’a mu‘âmele-i şer‘iyye ile yirmi bin fıddî râyic fi’l-vakt akçe verip mezbûre hâtun ve mukābelesinde mahalle-i mezbûrede vâki‘ olup, lede’l-ahâlî ve’l-cîrân ma‘lûmü’l-hudûd olan mülk menzilini rehin vaz‘ edip, ba‘de’t-tahliyye teslîm ve ikbâz ve ben dahi fâriğan kabz ve tesellüm edip, bir buçuk seneden berî zimmetine mu‘âmele-i şer‘iyyeden iki bin beş yüz akçe hâsıl olmağın, mezbûre Hatice’nin zimmetinde vakf-ı mezbûr için asıl ve ribhinden ve cem‘an yirmi iki bin beş yüz akçe vardır, suâl olunup deyn-i mezbûr vakf-ı mezbûr için tevliyyetim hasebi ile alıverilip fekk-i rehin olunmak taleb ederim dedikde, gıbbe’s-suâl mezbûr Mehmed Çelebi cevâbında, fi’l-vâki‘ müvekkilem mezbûre Hatice Hâtun zimmetinde mâl-ı vakf-ı mezbûrdan asl-ı mâldan ve ribh-i şer‘îden cem‘an yirmi iki bin beş yüz akçe zimmeti olup, meblağ-ı mezbûr mukābelesinde menzil-i mesfûr cânib-i vakıfda rehn-i makbûzdur deyû vekâlet-i mahkiyesi hasebi ile ikrâr etmeğin, meblağ-ı mezbûru cânib-i vakf-ı mezbûre müvekkilesinin mâlından edâ edip ve menzil-i mezbûru rehinden fekk etmek üzre sebt olundu. Fî evâili Ramazan sene [10] 27. Şuhûdü’l-hâl: Hasan b. Mustafa, Şaban b. Abdullah, el-Hâc Ali b. Abdullah.