İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 440 Hüküm no: 674 Orijinal metin no: [79b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Papa Dimitri’nin mîrâsçılarının Papa Toroni’deki alacakları hususunda davanın sulh Mahrûse-i Edirne mahallâtından Eskikafes mahallesi sâkinlerinden olup bundan akdem mürd olan Papa Dimitri’nin sulbiye kızı Seltan’ın, kıbel-i şer‘den mansûbe vasiyyesi ve vâlidesi olan Zafire bt. Dimitri nâm nasrâniye meclis-i şer‘-i kavîmde, hâmil-i hâze’l-kitâb Papa Toroni v. Papa Yaraki nâm râhib muvâcehesinde asâleten ve vesâyeten ikrâr ve takrîr-i kelâm edip, bundan akdem zevcim ve mûrisim olan merkūm Papa Dimitri hâl-i sıhhatinde iken merkūm Papa Toroni ile mâbeynlerinde nice ahz ü i‘tâ ve mu‘âmelât-ı şettâ olmakla ve merkūmun zimmetinde üç bin akçe hakkımız kalmışdır deyû taleb ve da‘vâ ettiğimizde, mezbûr Papa Toroni münkir olup, ityân-ı beyyineden âciz olup mezbûrun yemîn etmesi mukarrer olmağın, bu takdîrce sulh beynimizde enfa‘ olmakla muslihûn tavassutu ile an ibrâz bin beş yüz nakd-i râyic fi’l-vakt akçe vermek üzre mâbeynimizi ıslâh ettiklerinde, ben dahi asâleten ve vesâyeten sulh-ı mezbûru kabûl ve bedel-i sulh olan meblağ-ı mezbûru merkūm Papa Toroni yedinden bi’t-tamâm ahz u kabz edip, husûs-ı mezbûre müte‘allik âmme-i da‘âvâdan mezbûr Papa Toroni zimmetini ibrâ-i âmm-ı hâtimü’n-nizâ‘ ile ibrâ etdim. Ba‘de’l-yevm vesâ[yeten] ve vekâleten husûs-ı mezbûre müte‘allik da‘vâ sâdıre olursa lede’l-hükkâm ve zevi’l-ihtirâm mesmû‘a olmaya dedikde, mukırra-i merkūm Zafire’yi vech-i mezbûr üzre sâdır olan ikrârında el-mukarru lehü’l-mezbûr Papa Toroni vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fî evâili şehri Ramazâni’l-mübârek li sene seb‘a ve ışrîn ve elf. Şuhûdü’l-hâl: Hüseyin b. Hamza, Malkoç [b.] Abdullah, İbrahim [b.] Receb, Murad [b.] Mehmed, Bekir [b.] Osman, Mahmud [b.] Bâli ve gayruhüm.