İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 442 Hüküm no: 678 Orijinal metin no: [80a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Kösec Hüseyin’in Ali b. Abdullah’ın eşyasının mîrâsçıların vasîsine teslim edildiği Mahrûse-i Belgrad’dan olup bundan akdem mahmiye-i Kostantıniyye’de Kâtib Şemseddin mahallesinde fevt olup, yanında mevcûd olan emvâl ve erzâkı îdâ‘an Ali b. Abdullah nâm kimesne yedinde mazbût olan Kösec Hüseyin b. ( ) nâm kimesnenin verâseti sagīre sulbiye kızı Râbia’ya ve zevce-i metrûkesi olan Fâtıma bt. Mustafa nâm hâtun’a münhasıra idiği mütehakkik oldukdan sonra, sagīre-i mezbûrenin vasiyy-i şer‘îsi ve zevcesinin husûs-ı âti’z-zikre vekîli olup, nehc-i şer‘î üzre vesâyeti ve vekâleti sâbite olan Mustafa b. Abdülganî nâm kimesne meclis-i şer‘-i şerîfde mezbûr Ali b. Abdullah muvâcehesinde ikrâr ve i‘tirâf edip, müteveffâ-yı merkūmun muhallefâtından merkūm Ali Bey yedinde olan bir donluk yeşil çuka ve bir keman ve mükemmel oklu bir tirkeş ve bir Rûmî sâde kılınç ve bir çift rikâb ve bir çeşte eyer ve bir sâde oyalı? ma‘a sînebend ve bir kırmızı çuka kilim ve bir leğen ma‘a ibrik ve bir sîm hançer ve iki don gömlek ma‘a uçkur ve bir benefşe kuşak ve bir ….? tesbîh ve bir münakkaş yastık ve bir beyaz boğasi zıbın ve bir mor çuka dolama müsta‘mel ve bir yeşil dolama müsta‘mel ve bir beyaz karzen? zıbın ve iki karzen? çakşır ve bir diz çakşırı ve bir yelek kürklü yeşil Şirvânî ve bir çuka-ı Kürdiye mor kuzu kürklü ve bir beyaz ihrâm ve bir köhne destâr ve üç aded bel makramaları ve bir gırâr ve bir cedîd destâr ve bir destâr örtüsü ve iki Engürüs bıçakları ve bir beyaz boğasi üzre münakkaş boğça ve bir münakkaş cedîd berber makraması ve bir heybede üç bin yüz akçe, cümle bu zikr olunan eşyâ-yı mezbûr Ali’den vesâyeten ve vekâleten alıp kabz edip, bu cümleden kalîl ve kesîr yedinde bir sihâmı kalmadı dedikde, el-mukarru lehü’l-merkūm Ali merkūm Mustafa’yı ikrâr-ı meşrûhunda vicâhen tasdîk ve şifâhen tasdîk ettikde mâ hüve’l-vâki‘ bi’t-taleb kayd şüd. Tahrîren fî evâsıtı şehri Ramazâni’l-mübârek li sene seb‘a ve ışrîn ve elf. Şuhûdü’l-hâl: Mahmud b. Abdullah el-cündî, Cafer b. Abdullah, el-Hâc İbrahim el-müezzin, Ramazan Bey el-cündî, Habib Efendi an Belgrad ve gayruhüm.